Depýtat Aıdos Sarym eki alpaýyt eldiń arasyndaǵy soǵysqa Qazaqstan sońyna deıin beıtarap pikirin ustap turýyn jetkizdi. Sebebi, birjaqty pikir nemese qoldaý elimizge zııan tıgizýi múmkin, dep habarlaıdy “Adyrna” ulttyq portaly.
«Qazaqstan sońyna deıin beıtaraptylyqty saqtap qalýy kerek. Álde erikti bolyp barǵylaryńyz keledi me? Reseıdiń djıhad jarııalaǵanyn qalaısyz ba? Myna suraqqa jaýap berińizshi: mıllıondaǵan adamnyń bosqyndar lagerinde turyp, Ózbekstanǵa nemese Qyrǵyzstanǵa qashýyn nemese bizdiń qalalardyń bombanyń astynda qalǵanyn qalaısyz ba? Basqany aıtpaı turyp, qazaqstandyqtar óz shańyraǵyna 20 týysyn kirgizýge daıyn ba? Bizdiń áskerimiz daıyn ba? Men bizdiń áskerdiń ahýaly qazirgi álemde bolyp jatqan syn-qaterlerge daıyn emes dep esepteımin. Qańtardaǵy oqıǵalar kóp shyndyqtyń betin ashyp berdi», – dedi depýtat Májilis alańynda suraq qoıǵan jýrnalısterge.
Depýtat eki el arasynyń buzylýy hám ekige bólinýi múmkin emestigin alǵa tartty.
«Menen ylǵı Qazaqstan Reseıdiń yqpalynan qashan qutylady dep suraıtyn. Meniń jaýabym árqashan bireý – eshqashan. Óıtkeni biz kórshimiz jáne bizdiń ekonomıkamyz bir-birimen óte tyǵyz baılanysty. Saýdanyń tórtten biri Reseı arqyly keledi. Sol sebepti, biz eshqashan qutyla almaımyz. Biz basqa da áreketterdi jasaı alamyz. Qosymsha sharalar qabyldap, bırjadaǵy saýdany shekteý arqyly táýeldilikti sál bolsa da azaıta alamyz», – dedi Aıdos Sarym.
“Adyrna” ulttyq portaly
