پاۆلودارلىق «ءتىل جاناشىرى» «قۇرمەت» بەلگىسىنىڭ يەگەرى رۋزا بەيسەنبايتەگى رەداكتسيامىزعا حابارلاسىپ، وزىنە كۇش قولدانىلعانىن ايتتى. قوعامدىق ورىنداردا قازاق تىلىندە قىزمەت كورسەتۋدى سۇراعان تۇرعىنعا كۇش قولدانىلسا دا، جەرگىلىكتى پوليتسيا قول ۇشىن سوزباعان كورىنەدى. بۇگىن 13 جىل بويى قازاق ءتىلى ءۇشىن كۇرەسىپ كەلە جاتقان رۋزا بەيسەنبايتەگى اكتسياعا شىقپاق.
— بۇگىن «باقاۋوۆ، قازاق ءتىلىن قورلاتپا!» دەگەن ۇرانمەن اكتسياعا شىعامىن. سەبەبى پوليتسيا ەشتەڭە ىستەمەي وتىر. وسىدان ءبىراز ۋاقىت بۇرىن جاسقايرات قايىروۆ دەگەن جەرگىلىكتى پوليتسيا باسشىسى «ءبىز بارلىق پوليتسيا قىزمەتكەرلەرىن شاقىرىپ بارلىق تۇرعىن قازاق تىلىندە سويلەۋگە، قازاق تىلىندە جاۋاپ الۋعا قۇقىلى ەكەنىن ايتامىز. تىلگە بايلانىستى داۋ شىقسا، وقيعا ورنىنان بارىپ شەشەمىز»، – دەپ ايتقان بولاتىن. ارادا ءبىر اپتا وتسە دە، ەشقانداي ناتيجە بولعان جوق، – دەيدى رۋزا بەيسەنبايتەگى.
ءتىل جاناشىرىنىڭ ايتۋىنشا، جەرگىلىكتى بيلىك پەن جەرگىلىكتى پوليتسيا قۇرعاق سوزبەن جىلى جاۋىپ قويۋعا ۇيرەنگەن. پاۆلودار وبلىسىنىڭ اكىمى بولات باقاۋوۆقا ەكى رەت تەلەفونوگرامما جىبەرگەنىن دە ايتتى.
— باقاۋوۆقا ەكى رەت تەلەفونوگرامما تاستادىم. ەكەۋى دە قوعامدىق كولىكتە ايالدامالاردى، جول اقىسىن تولەۋدى قازاق تىلىندە ايتۋدى سۇراعانىما بايلانىستى. بىرىنشىسىندە ەگەر پوليتسيا قىزمەتكەرلەرى كەلمەسە، اۆتوبۋستىڭ استىنا تۇسەمىن دەپ ايتتىم. ال ەكىنشىسىندە اكتسيا جاساعالى جاتقانىمدى حابارلادىم»، – دەيدى رۋزا بەيسەنبايتەگى.
ايتا كەتسەك، وسىدان اي بۇرىن رۋزا بەيسەنبايتەگى رەداكتسيامىزعا حابارلاسىپ، اۆتوبۋس كوندۋكتورىنان جولاقىسىن قازاق تىلىندە سۇراۋدى وتىنگەن. ارتىنشا ءىس ناسىرعا شاۋىپ، پوليتسيا قىزمەتكەرلەرى كەلمەسە، اۆتوبۋستىڭ استىنا تۇسەتىنىن ايتقان ەدى.
رۋزا بەيسەنبايتەگىنىڭ ايتۋىنشا، ونىڭ اكتسياعا شىققاننان باسقا امالى قالماعان. جەرگىلىكتى پوليتسيا وبلىسى اكىمىنە باعىنىشتى، ونىڭ سوزىنەن اتتاپ شىعا المايدى.
— قولىمدا قازاق تىلىندە قىزمەت كورسەتۋىن سۇراعانىم ءۇشىن مەنى اۆتوبۋستان سۇيرەپ شىعارعان، تەلەفونىمدى تارتىپ العان ۆيدەولار بار. مەن سول ۆيدەولاردى پوليتسياعا كورسەتكىم كەلدى. الايدا مەنى مازاق قىلعان ادامشا ءۇش پوليتسيا كولىگى جانىمنان ءوتتى. مەندە ونىڭ دا ۆيدەوسى بار. ءبىر ساعاتتان كەيىن ايالدامادان 100 مەتر جەرگە پوليتسيا كولىگى كەلىپ توقتادى. بارىپ، ءمان-جايدى ايتقانىمدا، «بىزگە ەشقانداي تاپسىرما بەرىلگەن جوق، ەشتەڭە ىستەي المايمىز»، – دەپ ايتتى، – دەيدى رۋزا بەيسەنبايتەگى.
— مەن وسىلاي ەتپەسەم، ءبىز وسىلاي ەتپەسەك قازاق ءتىلى قورلانا بەرەدى، – دەپ كۇيىنىشپەن اياقتادى ءسوزىن رۋزا بەيسەنبايتەگى.
پاۆلودار وبلىسىنىڭ اكىمى بولات باقاۋوۆ مەملەكەتتىك ءتىلدىڭ مارتەبەسىن قورعاپ، جۇيەلى ءىس قىلۋعا شاماسى كەلەر دەپ سەنگىمىز كەلەدى. ايتپەسە، باسقا ەمەس، اقورداعا بارىپ، «ءتىل جاناشىرى» «قۇرمەت» بەلگىسى ماراپاتىن العان رۋزاداي قوعام قايراتكەرىنىڭ ءوزى وسىلاي قازاق تىلىندە سويلەگەنى ءۇشىن جاپا شەگىپ جاتسا، قاراپايىم قازاقتىڭ كۇيى قانداي بولماق؟ وڭىردە مەملەكەتتىك ءتىل مارتەبەسىن اسقاقتاتۋعا شاماسى كەلمەسە، باقاۋوۆ بۇل قىزمەتتە نە ءۇشىن وتىر دەگەن زاڭدى سۇراق تا تۋىندايدى. ءبىز وبلىس اكىمى ءاربىر ترامۆايدى ارالاپ ءجۇرۋ كەرەك دەمەيمىز، الايدا قۇزىرلى ورگان باسشىلارىنىڭ مەملەكەتتىك ءتىل مارتەبەسىن قورعاۋىن قاداعالاۋ اكىمنىڭ تىكەلەي ەڭ ماڭىزدى جۇمىسى ەمەس پە؟..
Qamshy.kz
