كۇنى كەشە عانا بەيجىڭدە اياقتالعان قىسقى وليمپيادا ويىندارىنىڭ اشىلۋ جانە جابىلۋ سالتاناتىندا ەلىمىزدىڭ كوك بايراعىن ۇستاپ شىققان شورت-ترەكشى ابزال اجىعاليەۆ قازاقستانداعى سپورت سالاسىنىڭ كەمشىن تۇستارى تۋرالى ءوزىنىڭ الەۋمەتتىك جەلىلەردەگى پاراقشالارىندا جاريالادى.
وليمپيادادا ءتورتىنشى ورىن العان قازاق سپورتشىسى جارىس كەزىندە قولداۋ بىلدىرگەن جانكۇيەرلەرگە العىسىن ايتىپ، وليمپيادانىڭ ءىزى سۋىماي، اسەرى قايتپاي تۇرعاندا ءوزى اينالىساتىن شورت-ترەك سپورتىنىڭ نەگىزىندە قوردالانعان ماسەلەردى تاپتىشتەپ جازدى.
«مۇز ايدىنى. الاۋ قازىردە شورت-ترەكشىلەردىڭ جاتتىعۋىنا ساي كەلەتىن قازاقستانداعى جالعىز مۇز ايدىنى. بىراق بىزگە وندا تۇراقتى دايىندالۋعا مۇمكىندىك بەرىلمەيدى، ءبىز سوندىقتان امال جوق ەۋروپاعا نەمەسە رەسەيدە جاتتىعۋعا شىعامىز. الاۋدا بارلىعى يدەالنو بولعانىمەن ول ۇلتتىق قۇراماعا ارنالماعان. بىزگە كەمىندە كۇنىنە تاڭەرتەڭ جانە كەشكە ەكى ساعاتتان كەرەك. بىراق مۇز سارايى جەكەمەنشىك بولعاندىقتان بارلىعى اقشاعا كەلىپ تىرەلەدى. ال ۇلتتىق قۇرامالاردا ونداي اقشا جوق. بىزدە وندا ارنايى ورىن قاراستىرىلماعان، ءتىپتى جاتتىعۋ كەزىندە زاتتارىمىزدى تاستاپ كەتەتىن ارنايى كيىم اۋىستىراتىن جەر دە تابىلمايدى. پەكين وليمپياداسىنىڭ الدىندا ءبىز الاۋدا دايىندالدىق. بىراق بىزگە مۇز تەك وليمپيادا الدىندا ەمەس، ۇنەمى كەرەك. ايتپاقشى، مۇز تەك ۇلتتىق قۇرامادا ەمەس، جاستار مەن جاسوسپىرىمدەردە دە قاراستىرىلماعان. ءبىزدىڭ سپورت بويىنشا، ناقتى ءبىزدىڭ سپورتىمىز ءۇشىن باستى پروبلەما وسى. بارلىعى مەدال سۇرايدى. ال بىزدە ءتىپتى قىسقى سپورت تۇرلەرىنە ارنالعان بازا دا جوق. ال جانكۇيەرلەر مۇنداي سپورتتىڭ بارىنان ءتىپتى حابارسىز»، – دەيدى ابزال.
سپورتشى ءار وڭىردە مۇز سارايلارى سالىنعانىمەن، ولاردىڭ ەشقايسىسى شورت-ترەكشىلەردىڭ جاتتىعۋىنا جارامايتىنىن ايتادى. جاراقات الىپ قالۋ قاۋىپى وتە جوعارى ەكەن. ال، الماتىداعى مۇز سارايلارىندا دا بوس ۋاقىت جوق.
«بىزگە كەرەكتى قۇرال جابدىقتاردى تەك زاڭدا رۇقسات ەتىلگەن شامادا عانا الىپ بەرەدى. ينۆەنتار الۋدى ءبىز ءۇشىن مۇزدان كەيىنگى ۇلكەن ماسەلە دەپ ايتار ەدىم. ءدال وسىنداي پروبلەماعا توكيونىڭ الدىندا ساداقشىلار دا تاپ بولدى. وسى پروبلەما بارلىق سپورتشىنىڭ باسىنان وتەدى جانە سپورتشىلار ءاردايىم وسىنى ايتىپ كەلەمىز. بىراق وعان مينيسترلىك نەمەسە باسقارمالار ءمان بەرىپ وتىرعان جوق. كوڭىل اۋدارسا دا تەك وليمپيادانىڭ الدىندا ەسىنە الادى. كاسىبي سپورتقا تەك وليمپيادا كەزىندە ەمەس، ۇنەمى، تۇراقتى نازار اۋدارىپ، جۇمىس ىستەپ وتىرۋ كەرەك. ءبىزدىڭ سپورت ءۇشىن ۆەلوجاتتىعۋلار وتە ماڭىزدى. وعان ۆەلوستانوك، ۆەلوسيپەد، كونكيىمىزدى قارايتىن گەيچ پەن كۇش ولشەيتىن تەحنيكالار كەرەك. بارلىق ەلدىڭ كوماندالارى اتالعاندارمەن تولىق قامتاماسىز ەتىلگەن، ءبىز ولاردى ونسىز دا جەڭىپ ءجۇرمىز. بىراق بىزگە بەرىلگەن ۋادە، ۋادە كۇيىندە قالادى. ءاردايىم اڭگىمە ينۆەنتارعا كەلىپ تىرەلگەندە گوسزاكۋپتىڭ پروتسەستەرىنە بايلانىستى كەشىكتىرىلىپ جاتىر دەپ سىلتاۋراتادى. حالىقارالىق جاتتىعۋلار ءبىزدىڭ جابدىقتارىمىز جوق دەپ توقتاپ تۇرمايدى عوي. ناتيجەسىندە ءبىزدىڭ مەحانيكتەر ءوز قالتالارىنان اقشا شىعارىپ، كونكيگە ارنالعان زاپچاستاردى ساتىپ اپەرەدى. نەمەسە ءبىز “زاڭدا رۇقسات ەتىلمەگەن” دەپ ايتقان سوڭ كەيبىر قۇرالداردى ءوز اقشامىزعا جيناپ الۋعا تۋرا كەلەدى. سەبەبى، ءبىز ينۆەنتار جوق نەمەسە جەتپەيدى دەپ ءبىر جارىسقا قاتىسپاي قويا المايمىز. ءبىزدىڭ جارىستار تەندەر قاشان وتەتىنىن كۇتىپ وتىرمايدى. بۇل تەك بيىل ەمەس، جىلدا قايتالاناتىن نارسە»، – دەپ جازادى شورت-ترەكشى.
ابزالعا وبلىستىق سپورت باسقارماسى وسىعان دەيىن بىرنەشە رەت ۆەلوسيپەدتى الىپ بەرەمىز دەپ ۋادە بەرگەن كورىنەدى. سپورتشى دەمەۋشىلەردى دە ىزدەپ كورىپتى. بىراق ولاردان جاۋاپ جوق ەكەن. ابزالدىڭ ايتۋىنشا قىسقى سپورت ۇنەمى جازعى سپورتتىڭ تاساسىندا قالىپ قالادى.
«جالپى شورت-ترەك تۋرالى كوپ ادام بىلە بەرمەيدى، كوپ جازىلمايدى. وسى سپورتىمىزدى وليمپيادا كەزىندە عانا ەمەس، جالپى بارلىق كەزدە بىلسە ەكەن دەيسىڭ.بىلەسىز بە، شورت-ترەكتى تۇسىنەتىندەر از، ال قازىر كوبى وليمپيادا ويىندارىن كورىپ، بۇل سپورت تۇرىمەن تانىسقاندارىن جازادى. بىراق ءبىز كوپ جىلدار بويى الەم كۋبوگتارىنا قاتىسىپ، الەمنىڭ ۇزدىك وندىعىنا كىرەمىز، وليمپيادا چەمپيوندارىمەن بىردەي جۇگىرىپ، ولاردى وزىپ تا جاتامىز. جەڭەمىز. بىراق مەدال العان كەزدە ەشقانداي قولداۋ بولمايدى، كىشكەنە بولسا دا وسى ماسەلەگە نازار اۋدارىلىپ، سىياقى تاعايىندالسا. بۇل دا زاڭ بويىنشا قاراستىرىلماعان. ال سپورتشىلاردىڭ جالاقىسى، ايلىعى قازاقستانداعى ورتاشا جالاقىعا جەتە بەرمەيدى. جەڭىسكە جەتكەندە ەل نامىسىن قورعايمىز، بىراق ونىڭ جەمىسى رەتىندە نازار دا اۋدارىلمايدى. بىزدە باسقا ەلدەردەگىدەي دەمەۋشىلىك جوق، تەكمەملەكەتكە عانا سەنەمىز. وسىلاي ايتقانىم دۇرىس پا، جوق پا بىلمەدىم. بىراق وليمپيادادان باسقا كەزدە ەشكىمگە كەرەك ەمەس سپورتتان قالاي ناتيجە كۇتۋگە، سۇراۋعا، تالاپ ەتۋگە بولادى؟»، – دەيدى ابزال اجىعاليەۆ.
سپورتشى 2018 جىلعى وڭتۇستىك كورەيادا وتكەن وليمپيادادان كەيىن جاراقات الىپ، ۇزاق ۋاقىت دەنساۋلىعىندا پروبلەما بولعانىن جازادى. سول ۋاقىتتا ۇلتتىق قۇرامادان شەتتەتىلىپ، ءوز قاراجاتىنا ەمدەلگەن ەكەن. «بىزدە جاراقات الساڭ ەشكىمگە كەرەك ەمەسسىڭ»، – دەيدى ابزال.
«قازىر وليمپيادا ءبىتتى. يا، بىلەمىن، ەشكىم ناتيەسىنە ءماز ەمەس. ءبىزدىڭ كىشكەنتاي كوماندامىز ءۇشىن بۇل وتە ۇلكەن جانە تاريحي كورسەتكىش ەدى. كەلەسى وليمپيادادا ناتيجە جوعارى بولۋى ءۇشىن قازىردەن باستاپ قيمىلداۋ كەرەك، بىزدەگىدەي وليمپياداعا جارتى جىل قالعاندا ەمەس. بىزدە جازعى سپورتقا نازار كوپ اۋدارىلعان سوڭ تالاپ تا جوعارى. سوڭىندا ءبارى،جانكۇيەرلەر دە قىسقى سپورتتان دا كەلىپ سونداي ناتيجە كۇتەدى. مەنىڭ ەڭ ۇلكەن ارمانىم – ەلىمىزدىڭ كوك بايراعىن الەمدىك ارەنالاردا جەلبىرەتۋ، اۋىلدارداعى، رەگيوندارداعى بالالاردىڭ بارلىعى بىردەي سپورتپەن اينالىسا السا، ولار دا تاڭداۋ جاساي السا، قازاقستاندا سپورتشىنىڭ، سپورتشى بولۋدىڭ مارتەبەسىن بىلسە جانە ونىڭ قانداي ەڭبەك ەكەنىن بىلسە. قازىر بىزدە ەگەر سەندە مەدال بولسا، سەنى جاقسى كورەدى، سوسىن بارىپ ساعان جاعداي جاسايدى. بىراق مەدال بولۋى ءۇشىن ءبىرىنشى جاعداي جاسالىنۋى كەرەك قوي. بازادان باستاپ، قاراپايىم كۇندەلىكتى جاتتىعۋ دا وسى جاعدايعا كىرەدى. ءسوز سوڭىندا مەن ءوز كومانداما، جاتتىقتىرۋشىلارىما كوپ راحمەت دەگىم كەلەدى. ءبىز مۇنىمەن توقتاپ قالمايمىز. وسى ۋاقىتقا دەيىن تالاي قيىندىقتى ەڭسەرىپ، مويىمادىق. ءارى قاراي دا بيىك بەلەستى باعىندىرۋعا بارىمىزدى سالامىز. جاقسى ناتيجەگە قول جەتكىزۋ ءۇشىن ايانبايمىز. ءبىزدى ۇنەمى قولداپ، جاناشىر بولىپ وتىرعان ارقايسىسىڭىزعا العىس. ەلىمىزدەگى سپورتتى وسىرەتىن دە، وشىرەتىن دە ءوزىمىز. سوندىقتان مەنىڭ وسى ايتقاندارىم ءتيىستى جەرگە جەتەدى دەپ ويلايمىن»، – دەدى ابزال.
ەستەرىڭىزگە سالا كەتەيىك، بەيجىڭدەگى وليمپيادا ويىندارىندا شورت-ترەكتەن 500 م قاشىقتىق بويىنشا سىنعا تۇسكەن ابزال اجىعاليەۆ 4-ورىندى يەلەنىپ، ارالاس ەستافەتادا بەسىنشى ناتيجە كورسەتتى.
