Kúni keshe ǵana Beıjińde aıaqtalǵan qysqy Olımpıada oıyndarynyń ashylý jáne jabylý saltanatynda elimizdiń kók baıraǵyn ustap shyqqan short-trekshi Abzal Ájiǵalıev Qazaqstandaǵy sport salasynyń kemshin tustary týraly óziniń áleýmettik jelilerdegi paraqshalarynda jarııalady.
Olımpıadada tórtinshi oryn alǵan qazaq sportshysy jarys kezinde qoldaý bildirgen jankúıerlerge alǵysyn aıtyp, Olımpıadanyń izi sýymaı, áseri qaıtpaı turǵanda ózi aınalysatyn short-trek sportynyń negizinde qordalanǵan máselerdi táptishtep jazdy.
«Muz aıdyny. Alaý qazirde short-trekshilerdiń jattyǵýyna saı keletin Qazaqstandaǵy jalǵyz muz aıdyny. Biraq bizge onda turaqty daıyndalýǵa múmkindik berilmeıdi, biz sondyqtan amal joq Eýropaǵa nemese Reseıde jattyǵýǵa shyǵamyz. Alaýda barlyǵy ıdealno bolǵanymen ol ulttyq quramaǵa arnalmaǵan. Bizge keminde kúnine tańerteń jáne keshke eki saǵattan kerek. Biraq muz saraıy jekemenshik bolǵandyqtan barlyǵy aqshaǵa kelip tireledi. Al ulttyq quramalarda ondaı aqsha joq. Bizde onda arnaıy oryn qarastyrylmaǵan, tipti jattyǵý kezinde zattarymyzdy tastap ketetin arnaıy kıim aýystyratyn jer de tabylmaıdy. Pekın Olımpıadasynyń aldynda biz Alaýda daıyndaldyq. Biraq bizge muz tek Olımpıada aldynda emes, únemi kerek. Aıtpaqshy, muz tek ulttyq quramada emes, jastar men jasóspirimderde de qarastyrylmaǵan. Bizdiń sport boıynsha, naqty bizdiń sportymyz úshin basty problema osy. Barlyǵy medal suraıdy. Al bizde tipti qysqy sport túrlerine arnalǵan baza da joq. Al jankúıerler mundaı sporttyń barynan tipti habarsyz», – deıdi Abzal.
Sportshy ár óńirde muz saraılary salynǵanymen, olardyń eshqaısysy short-trekshilerdiń jattyǵýyna jaramaıtynyn aıtady. Jaraqat alyp qalý qaýipi óte joǵary eken. Al, Almatydaǵy muz saraılarynda da bos ýaqyt joq.
«Bizge kerekti qural jabdyqtardy tek zańda ruqsat etilgen shamada ǵana alyp beredi. Inventar alýdy biz úshin muzdan keıingi úlken másele dep aıtar edim. Dál osyndaı problemaǵa Tokıonyń aldynda sadaqshylar da tap boldy. Osy problema barlyq sportshynyń basynan ótedi jáne sportshylar árdaıym osyny aıtyp kelemiz. Biraq oǵan mınıstrlik nemese basqarmalar mán berip otyrǵan joq. Kóńil aýdarsa da tek Olımpıadanyń aldynda esine alady. Kásibı sportqa tek Olımpıada kezinde emes, únemi, turaqty nazar aýdaryp, jumys istep otyrý kerek. Bizdiń sport úshin velojattyǵýlar óte mańyzdy. Oǵan velostanok, velosıped, konkıimizdi qaraıtyn geıch pen kúsh ólsheıtin tehnıkalar kerek. Barlyq eldiń komandalary atalǵandarmen tolyq qamtamasyz etilgen, biz olardy onsyz da jeńip júrmiz. Biraq bizge berilgen ýáde, ýáde kúıinde qalady. Árdaıym áńgime ınventarǵa kelip tirelgende goszakýptyń proesterine baılanysty keshiktirilip jatyr dep syltaýratady. Halyqaralyq jattyǵýlar bizdiń jabdyqtarymyz joq dep toqtap turmaıdy ǵoı. Nátıjesinde bizdiń mehanıkter óz qaltalarynan aqsha shyǵaryp, konkıge arnalǵan zapchastardy satyp áperedi. Nemese biz “zańda ruqsat etilmegen” dep aıtqan soń keıbir quraldardy óz aqshamyzǵa jınap alýǵa týra keledi. Sebebi, biz ınventar joq nemese jetpeıdi dep bir jarysqa qatyspaı qoıa almaımyz. Bizdiń jarystar tender qashan ótetinin kútip otyrmaıdy. Bul tek bıyl emes, jylda qaıtalanatyn nárse», – dep jazady short-trekshi.
Abzalǵa oblystyq sport basqarmasy osyǵan deıin birneshe ret velosıpedti alyp beremiz dep ýáde bergen kórinedi. Sportshy demeýshilerdi de izdep kóripti. Biraq olardan jaýap joq eken. Abzaldyń aıtýynsha qysqy sport únemi jazǵy sporttyń tasasynda qalyp qalady.
«Jalpy short-trek týraly kóp adam bile bermeıdi, kóp jazylmaıdy. Osy sportymyzdy Olımpıada kezinde ǵana emes, jalpy barlyq kezde bilse eken deısiń.Bilesiz be, short-trekti túsinetinder az, al qazir kóbi Olımpıada oıyndaryn kórip, bul sport túrimen tanysqandaryn jazady. Biraq biz kóp jyldar boıy álem kýbogtaryna qatysyp, álemniń úzdik ondyǵyna kiremiz, Olımpıada chempıondarymen birdeı júgirip, olardy ozyp ta jatamyz. Jeńemiz. Biraq medal alǵan kezde eshqandaı qoldaý bolmaıdy, kishkene bolsa da osy máselege nazar aýdarylyp, syıaqy taǵaıyndalsa. Bul da zań boıynsha qarastyrylmaǵan. Al sportshylardyń jalaqysy, aılyǵy Qazaqstandaǵy ortasha jalaqyǵa jete bermeıdi. Jeńiske jetkende el namysyn qorǵaımyz, biraq onyń jemisi retinde nazar da aýdarylmaıdy. Bizde basqa elderdegideı demeýshilik joq, tekmemleketke ǵana senemiz. Osylaı aıtqanym durys pa, joq pa bilmedim. Biraq Olımpıadadan basqa kezde eshkimge kerek emes sporttan qalaı nátıje kútýge, suraýǵa, talap etýge bolady?», – deıdi Abzal Ájiǵalıev.
Sportshy 2018 jylǵy Ońtústik Koreıada ótken Olımpıadadan keıin jaraqat alyp, uzaq ýaqyt densaýlyǵynda problema bolǵanyn jazady. Sol ýaqytta ulttyq quramadan shettetilip, óz qarajatyna emdelgen eken. «Bizde jaraqat alsań eshkimge kerek emessiń», – deıdi Abzal.
«Qazir Olımpıada bitti. Ia, bilemin, eshkim nátıesine máz emes. Bizdiń kishkentaı komandamyz úshin bul óte úlken jáne tarıhı kórsetkish edi. Kelesi Olımpıadada nátıje joǵary bolýy úshin qazirden bastap qımyldaý kerek, bizdegideı Olımpıadaǵa jarty jyl qalǵanda emes. Bizde jazǵy sportqa nazar kóp aýdarylǵan soń talap ta joǵary. Sońynda bári,jankúıerler de qysqy sporttan da kelip sondaı nátıje kútedi. Meniń eń úlken armanym – elimizdiń kók baıraǵyn álemdik arenalarda jelbiretý, aýyldardaǵy, regıondardaǵy balalardyń barlyǵy birdeı sportpen aınalysa alsa, olar da tańdaý jasaı alsa, Qazaqstanda sportshynyń, sportshy bolýdyń mártebesin bilse jáne onyń qandaı eńbek ekenin bilse. Qazir bizde eger sende medal bolsa, seni jaqsy kóredi, sosyn baryp saǵan jaǵdaı jasaıdy. Biraq medal bolýy úshin birinshi jaǵdaı jasalynýy kerek qoı. Bazadan bastap, qarapaıym kúndelikti jattyǵý da osy jaǵdaıǵa kiredi. Sóz sońynda men óz komandama, jattyqtyrýshylaryma kóp rahmet degim keledi. Biz munymen toqtap qalmaımyz. Osy ýaqytqa deıin talaı qıyndyqty eńserip, moıymadyq. Ári qaraı da bıik belesti baǵyndyrýǵa barymyzdy salamyz. Jaqsy nátıjege qol jetkizý úshin aıanbaımyz. Bizdi únemi qoldap, janashyr bolyp otyrǵan árqaısysyńyzǵa alǵys. Elimizdegi sportty ósiretin de, óshiretin de ózimiz. Sondyqtan meniń osy aıtqandarym tıisti jerge jetedi dep oılaımyn», – dedi Abzal.
Esterińizge sala keteıik, Beıjińdegi Olımpıada oıyndarynda short-trekten 500 m qashyqtyq boıynsha synǵa túsken Abzal Ájiǵalıev 4-oryndy ıelenip, aralas estafetada besinshi nátıje kórsetti.
