اقتوبەدە سۆەتقالي نۇرجاننىڭ "ەر ەدىگە" سپەكتاكلىنىڭ پرەمەراسى ءوتتى

951

اقتوبە وبلىستىق دراما تەاترىندا جازۋشى سۆەتقالي نۇرجاننىڭ ستسەناريى بويىنشا دانيار بازارقۇلوۆ قويعان "ەر ەدىگە" سپەكتاكلىنىڭ پرەمەراسى ءوتتى، دەپ حابارلايدى "ادىرنا" ۇلتتىق پورتالى.

ەتنو-فولكلورلىق تاريحي دراما ەدىگە باتىردىڭ ەرلىگى مەن قازاق تاريحىنىڭ جارقىن كەزەڭدەرى جايىندا باياندايدى. ايتا كەتەيىك، بۇل ەدىگە باتىردىڭ اتىن شىعارعان العاشقى سپەكتاكل. ونىڭ قويىلىمى التىن وردانىڭ 750 جىلدىعىنا ارنالعان.

"وقيعا توقتامىستىڭ حان ورداسىندا ءوربيدى. توعايبەك حانىم، توقتامىس حاننىڭ ايەلى
دالانىڭ ەكى ارىسى – توقتامىس حان مەن ەدىگە باتىردىڭ اراسىن الاۋىزداپ، ولار دۇشپانعا اينالادى. سپەكتاكلدە سونداي-اق، التىن وردانىڭ سوڭعى، مىزعىماس ءامىرشىسى ءامىر تەمىر مەن ەدىگە باتىردىڭ قارىم-قاتىناسى دا ايتىلادى",- دەيدى رەجيسسەر دانيار بازارقۇلوۆ.

قويىلىمداعى تاريحي وقيعالار ەدىگەنىڭ ەرلىگىن زامانداس اقىنداردىڭ جىرلاۋىمەن استاسىپ جاتىر.
كوپتەن كۇتكەن تۇساۋكەسەردە وبلىس اكىمى وڭداسىن ورازالين، سونىمەن قاتار، سپەكتاكل اۆتورى سۆەتقالي نۇرجان، قۇرمەتتى قوناقتار، سونىڭ ىشىندە ەلىمىزدىڭ وزگە وڭىرلەرىنەن كەلگەندەر بولدى.

وبلىس اكىمى وڭداسىن ورازالين تۇساۋكەسەردەن كەيىن: "بۇگىن ءبىز ايتۋلى وقيعانىڭ كۋاسى بولدىق. قويىلىمنىڭ وقيعا جەلىسى ءبىزدىڭ تاريحي جادىمىزدى وياتادى. ەدىگەنىڭ تاريحتاعى ورنى مەن ماڭىزى ءالى كۇنگە دەيىن تولىق زەرتتەلمەگەن. سوڭعى جىلدارى اقتوبە وبلىسىندا ۇلى باتىردىڭ ەسىمىن جاڭعىرتۋ جانە ساقتاۋ باعىتىندا اۋقىمدى جۇمىستار اتقارىلدى، ياعني حالىقارالىق عىلىمي-تاجىريبەلىك كونفەرەنتسيالار وتكىزىلىپ، ەسكەرتكىش ورناتىلدى، "ەر ەدىگە - نوعايلى ءداۋىرىنىڭ جىرى" اتتى البوم جيناعى تانىستىرىلدى. وڭىردە حالىقتىڭ باي مادەني مۇراسىن جۇيەلەندىرۋ جانە وزەكتىلەندىرۋ بويىنشا اۋقىمدى جۇمىستار جالعاساتىن بولادى",- دەپ اتاپ ءوتتى.

ايتا كەتۋ كەرەك، پرەمەرا 18-20 اقپان ارالىعىندا وتەدى. 

 

"ادىرنا" ۇلتتىق پورتالى.

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket