قازىرگى كۇنى الەۋمەتتىك جەلى كۇندەلىكتى ومىرىمىزدە نە بولىپ جاتقانىن انىق كورسەتەتىن اينا سىڭايلى. ەل ازاماتتارى قوعامدا ورىن العان كەز كەلگەن وقيعاعا قاتىستى ءوز ويىن، پىكىرىن اشىق بىلدىرۋگە داعدىلاندى.
ماسەلەن، جاقىندا عانا ەكس-پرەزيدەنتتىڭ ۇلكەن قىزى داريعا نازارباەۆانىڭ دەپۋتاتتىق مانداتىن تاپسىرۋى تۋرالى ماسەلە كوتەرگەن بەلگىلى ساياساتتانۋشى، ءماجىلىس دەپۋتاتى ايدوس سارىمنىڭ باستاماسى دا جەلىدەگى قولدانۋشىلاردىڭ نازارىنان تىس قالماپتى، دەپ حابارلايدى “ادىرنا” ۇلتتىق پورتالى “جاس الاش” باسىلىمىنا سىلتەمە جاساپ.
– وتكەن اپتادا نۇروتاندىق دەپۋتات ايدوس سارىم ەرەكشە كوزگە ءتۇستى، – دەپ جازدى الەۋمەتتىك جەلىدەگى پاراقشاسىندا بەلگىلى جۋرناليست ايدار ەرمەكوۆ. – ەلىمىزدە ورىن العان وزگەرىستەردەن كەيىن ونىڭ رۋحتانعانى سونشالىق، بۇرىن كوزگە ەلەستەتۋگە دە مۇمكىن بولمايتىن، داريعا نازارباەۆاعا قارسى ويىن اشىق ايتىپتى، – دەيدى جۋرناليست. سارىم: – «نازارباەۆا دەپۋتاتتىق وكىلەتتىگىن ءوز ەركىمەن تاپسىرۋعا ءتيىس، ويتكەنى، ونىڭ تەگى ياعني، اتى-ءجونى قازاقستاندا قالىپتاسقان اۆتوريتارلىق جۇيەمەن بايلانىستىرىلادى» دەپتى.
ەندەشە، ايىپقا بۇيىرماڭىز، دەپۋتات مىرزا، سوندا ءسىز، ءوزىڭىز مۇشەسى بولىپ تابىلاتىن جانە سونىڭ ارقاسىندا پارلامەنتكە وتكەن «نۇر وتان» پارتياسىن سول جۇيەمەن بايلانىستىرعىڭىز كەلمەي مە؟ بۇل پارتيانىڭ كىمنىڭ تۋىندىسى ەكەنى بارشاعا بەلگىلى عوي. ەندەشە، سىزگە دە ادال ادام رەتىندە دەپۋتاتتىق مانداتتان باس تارتۋ كەرەك شىعار.
“ادىرنا” ۇلتتىق پورتالى
