اتىراۋ وبلىسىندا بىردەن ءتورت اۋىل كارانتينگە جابىلدى. مۇنداي شارا قابىلداۋعا قىزىلقوعا اۋدانىنداعى ءىرى قارادان انىقتالعان ينفەكتسيا سەبەپ بولعان، دەپ حابارلايدى “ادىرنا” ۇلتتىق پورتالى حابار 24 ارناسىنا سىلتەمە جاساپ.
اۋداندا بارلىعى 700 باس ءىرى قارا اۋىرعان. ازىرگە مال سويۋ، ساتۋ نەمەسە اۋدان اۋماعىنان شىعارۋعا تىيىم سالىنعان.
مال دارىگەرلەرى ۆيرۋستىق ديارەيانىڭ ساعىز اۋىلىنان باستالىپ، 10 كۇن ىشىندە كورشىلەس ەلدى مەكەندەرگە تاراعانىن ايتادى. قازىر مۇقىر مەن جانەگەلدين اۋىلدارىنداعى ءىرى قارا دا شەتىنەن اۋىرا باستاعان.
ماماندار اۋرۋ تابىلعان ورىندارعا دەزينفەكتسيالاۋ جۇمىستارىن جۇرگىزىپ جاتىر. قايتا ۆاكتسينالاۋ باستالىپ، بارلىعى 20 مىڭ باس ءىرى قارا ەكپە سالىنعان.
"سيىرلارىمىز بىرنەشە كۇننەن بەرى تاماق ىشپەدى. ۇنەمى ديارەيا. مال دارىگەرلەرى قاراپ، ەكپە سالدى. ازىرگە باقىلاۋدامىز. سيىرلار ءبىزدىڭ اسىراۋشىلارىمىز عوي", - دەيدى ساعىز اۋىلىنىڭ تۇرعىنى التىناي تۇرجانوۆا.
"سىناما الىپ، استاناعا جىبەردىك. دياگنوز – ينفەكتسيالىق رينوتراحەيت پەن ۆيرۋستىق ديارەيا. قايتالاپ ۆاكتسينا سالىپ جاتىرمىز. ءبىز ەشكىمگە مالدى ساتۋ نەمەسە ورىنىن اۋىستىرۋ جونىندە انىقتاما بەرمەيمىز", - دەدى مال دارىگەرى كلارا سارسەنباەۆا.
“ادىرنا” ۇلتتىق پورتالى
