ەلىمىزدە باسپانا كەزەگىندە تۇرعان 590 مىڭ ادامنىڭ 210 مىڭى الەۋمەتتىك ساناتقا جاتادى. ۇكىمەت وتىرىسىندا قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ وسىنداي دەرەك كەلتىردى.
«بۇگىنگى كۇنى ەلىمىزدە شامامەن 590 مىڭ ادام كەزەكتە تۇر، سونىڭ ىشىندە 210 مىڭ ادام حالىقتىڭ الەۋمەتتىك جاعىنان وسال توبىنا جاتادى.
بۇل كوپ بالالى وتباسىلار، 1 جانە 2 توپتاعى مۇگەدەكتەر، جەتىم بالالار، مۇگەدەك بالالارى بار وتباسىلار.
سونىڭ ىشىندە ەڭبەك مينيسترلىگى بازاسىنىڭ دەرەكتەرىنە سايكەس تابىسى ەڭ تومەنگى كۇنكورىس دەڭگەيىنەن تومەن شامامەن 70 مىڭ ازامات قىسقا مەرزىم ىشىندە تۇرعىن ۇيمەن قامتاماسىز ەتىلۋى ءتيىس»، - دەدى مينيستر.
جالداۋ اقىسى مىناداي تارتىپپەن سۋبسيديالانباق:
- 50 % مەملەكەتتىك سۋبسيديالار ەسەبىنەن جابىلادى;
- قالعان 50 % الۋشى ءوز بەتىنشە تولەيدى.
«70 مىڭ ازاماتقا قولداۋ كورسەتۋ ءۇشىن 50 ملرد تەڭگە قاجەت، بۇل رەتتە كورسەتىلگەن قاراجات جىل سايىن كەزەكتە تۇرعان ادامدار سانىنا بايلانىستى وزگەرۋى مۇمكىن»، - دەدى ۆەدومستۆو باسشىسى.
"ادىرنا" ۇلتتىق پورتالى
