"قازاتومونەركاسىپ" كومپانياسىنىڭ بۇرىنعى باسشىسى مۇحتار جاكىشەۆ بەلگىلى مەديا مەنەدجەر ارمانجان بايتاسوۆتىڭ Baitassov LIVE Youtube ارناسىنا بەرگەن سۇحباتىندا ۇكىمەتتىڭ الداعى ۋاقىتتا اتقارۋى ءتيىس جۇمىسى مەن ەلدەگى قاۋىپسىزدىكتى قالپىنا كەلتىرۋ شارالارىنا جەتە توقتالدى. سونىمەن قاتار "قاسىرەتتى قاڭتار" وقيعاسىنا قاتىستى پىكىر ءبىلدىرىپ، بيلىككە ۇندەۋ تاستادى، دەپ حابارلايدى "ادىرنا" ۇلتتىق پورتالى.
- بىرىنشىدەن، قوعامىمىزداعى جىككە بولىنۋشىلىك تەرەڭدەپ كەتپەۋى ءۇشىن ەڭ الدىمەن نە ىستەۋ كەرەك؟ مەن قازىر ءوز وتانداستارىنىڭ تاعدىرى بويىنشا شەشىم قابىلداعانداردىڭ بارلىعىنا ءوتىنىش ايتقىم كەلەدى. شەشىم قابىلداعاندا، بۇل ءسىزدىڭ وتانداستارىڭىز ەكەنىن ءبىرىنشى ورىنعا قويۋىڭىز كەرەك. ولاردىڭ ورنىندا ءسىز دە بولۋىڭىز مۇمكىن، ولار دا ءسىزدىڭ ورنىڭىزدا بولۋى مۇمكىن. بىراق بۇل ءسىزدىڭ حالقىڭىز. سىزدە باسقاسى جوق. سوندىقتان، ءسىز شەشىم قابىلداي وتىرىپ، كىناسىز ادامدى ادىلەتسىز سوتتاپ جاتقانىنا ءسال دە بولسىن كۇماندانساڭىز، ونى ءسىزدىڭ وتانداستاڭىز بولىپ تابىلاتىن جاقىن ادامنىڭ پايداسىنا قاراي دالەلدەڭىز. سىزدە ودان باسقا جاقىن ادام جوق. بىردە-ءبىر فرانتسۋز، بىردە-ءبىر امەريكاندىق سىزبەن بىرگە ءبىر ەلدە تۇراتىن ادامنان جاقىن بولا المايدى. ءبىزدىڭ ماقساتتارىمىز ءبىر، بالالارىمىز ءبىر ەلدە تۇرادى. ءسىز دە وسى ەلدە تۇرۋدى جوسپارلاپ وتىرسىز. ءبىز ءبارىمىز بالالارىمىز لايىقتى ەلگە يە بولۋى ءۇشىن مەملەكەتىمىزدىڭ جاقسى جاققا وزگەرگەنىن قالايمىز. وسىنى ەسكە ساقتاعانىمىز ءجون، - دەپ پىكىر ءبىلدىردى مۇحتار جاكىشەۆ.
ونىڭ ويىنشا، ەلىمىزدە "قاسىرەتتى قاڭتار" وقيعاسىنا قاتىستى ورىن العان جاعدايلارعا بەيبىت ميتينگىگە شىققان وتانداستارىمىزدى جاپپاي كىنالاپ، ولارعا "تەرروريست" دەگەن اۋىر ايىپ تاعۋ دۇرىس ەمەس.
- قازىر ءباسپاسوز بەتتەرىندە ەلىمىزدە جاپپاي ازاپتاۋ ورىن الىپ جاتقانى، بەيبىت ميتينگىگە شىققان ادامداردى تەرروريستەر ساناتىنا اۋىستىرىپ جاتقانى جانە ت.ب. تۋرالى كوپ اقپارات بار. ءبىر نارسەنى ەسىڭىزگە ساقتاڭىز، بۇل ەشكىمگە قاجەت ەمەس! قازىر ءسىز تەرروريست رەتىندە كورسەتكىڭىز كەلەتىن ادامدار ارىپتەستەرىڭىزدىڭ ولىمىنە، ورىن العان وقيعالارعا كىنالى ەمەس. بۇعان ناعىز زۇلىمدىق دەپ الاتىن ءۇشىنشى كۇش كىنالى. ال نارازىلىق بىلدىرۋشىلەر مەن ءتارتىپ ساقشىلارى تاراپىنان زارداپ شەككەن ادامدار، شىن مانىندە وسى ءۇشىنشى كۇشتىڭ قىرعىنعا، ولىمگە بەرگەن زەڭبىرەك ەتى... سەبەبى قۇقىق قورعاۋ ورگاندارىنىڭ قۇرباندارى بولماسا، ول قانداي بۇلىك ؟ سوندىقتان ولارعا ءوز جوسپارلارىن جۇزەگە اسىرۋ ءۇشىن قۇرباندىق قاجەت بولدى. ءتارتىپ ساقشىلارى تاراپىنان دا، بەيبىت تۇرعىندار تاراپىنان دا. ءتۇسىنىپ وتىرسىز عوي. ولار ءسىزدىڭ جاۋلارىڭىز ەمەس ەكەنىن وتە جاقسى ءتۇسىنۋىڭىز كەرەك. بۇل ءسىزدىڭ وتانداستارىڭىز. سوندىقتان سىزگە قانداي قارىم-قاتىناس جاساعانىن قالاساڭىز، سىزدە ولارعا سونداي قارىم-قاتىناس جاساڭىز. مەنىڭ وسى ءبىر تىلەگىم ءبىزدىڭ قوعامىمىزدى، ءبىزدىڭ ۇلتتىق يدەيامىزدى نىعايتىپ، العاشقى قادام جاساۋعا مۇمكىندىك بەرەدى دەپ ويلايمىن. ويتكەنى رەفورما ءۇشىن بىزگە توپتاسۋ كەرەك. بۇل توپتاسۋ كەز كەلگەن جاعدايدا ءبىرىنشى قادامنان باستاۋ الادى. وسى العاشقى قادامدى جاسايىق. سەبەبى، بۇگىن جىبەرىلگەن كەز كەلگەن ادىلەتسىزدىك ءتۇبى مىندەتتى تۇردە اشىلادى جانە بولاشاقتا ەسەلەپ كوبەيەدى. بولاشاق تاعى دا ءبىر جارىلىستىڭ سەبەپكەرى بولۋى مۇمكىن. مۇنى قازىر وتانداستارىمىزدىڭ ۇستىنەن تەرگەۋ جۇرگىزىپ، ولاردىڭ تاعدىرى تۋرالى شەشىم قابىلداعانداردىڭ ءبارى ءتۇسىنۋى كەرەك، - دەدى مۇحتار ەركىنۇلى.
"ادىرنا" ۇلتتىق پورتالى
