جاقىندا جەلىدە قارت اجەسى، زاعيپ اناسى مەن ەكى كەمتار اعاسىمەن ء"ۇي" دەۋگە كەلمەيتىن جەردە تۇرىپ جاتقان 9 جاستاعى ورازىمبەتتىڭ وقيعاسى ەلدى ەلەڭ ەتكىزگەن ەدى. ء"بىر-اق ارمانىم بار، ونى ورىنداساڭىزدار، ءوزىم دە قايتارىپ بەرەمىن" دەگەن ورازىمبەتتىڭ سول ارمانى بۇگىن ورىندالىپ وتىر. وعان شىمكەنت قالاسىنان ءۇي بەرىلدى، - دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەپ.
ەستەرىڭىزدە بولسا، بۇعان دەيىن "حارەكەت" قايىرىمدىلىق قورىنىڭ قۇرىلتايشى، اكتەر ماديار سەرىكپاەۆ ورازىمبەتتىڭ وتباسى تۇرىپ جاتقان ءۇيدى كورسەتكەن بولاتىن. كادرلاردان ءۇي كىرەبەرىسىندە وتالعان اعاشتار جينالىپ تۇرعانىن كورۋگە بولادى، ال ەسىكتەن كىرە بەرگەندە سىلاعى ءتۇسىپ، بۇزىلايىن دەپ تۇرعان قابىرعانى بايقايسىڭ. وعان قوسا بۇل جەردى جالعا الىپ وتىرعانى ايتىلادى.
"انامنىڭ كوزى كورمەيدى، اعام اۋرۋ، اجەم دە قارتايىپ كەلە جاتىر", - دەگەن ەدى ورازىمبەت.
سول كۇنى اكتەرمەن بىرگە ورازىمبەتتىڭ ءۇيىن كورۋگە بارعان قوردىڭ شىمكەنت قالاسى جانە تۇركىستان وبىلىسىنداعى جاۋاپتى وكىلى سەرىك داربىشەۆتىڭ سوزىنشە، اناسى 8-9 جاسىندا شەشەك اۋرۋىمەن كاتتى اۋىرىپ، كوزى كورمەي قالعان، ال ەكى اعاسى تۋعاننان كەمتار.
"مۇگەدەكتىك بويىنشا جاردەماقى مەن اجەسىنىڭ زەينەتاقىسىنا كۇن كورىپ كەلگەن. اناسى مەن اجەسى بارماعان، باسپاعان تاۋى جوق، ەش جەردەن جاردەم الا الماعانىن ايتتى. اكەسى جوق، جەتپەيتىن قۋ دۇنيە، جۇمىسسىزدىق، ىشىمدىككە سالىنىپ، تاستاپ كەتكەن ەكەن", - دەيدى ول.
ورازىمبەت قازىر 4-سىنىپتا وقيدى. سەرىك داربىشەۆتىڭ سوزىنشە، ۇلگەرىمى جاقسى، العىر، ءوز جاسىنان ەرتە جەتىلگەن، وي ءورىسى كەڭ بالا. ول كارتوپ قۋىرىپ، بوتقا جاساپ، كەسپە باسا دا الادى ەكەن.
"بالانىڭ اقشانى سوسىن قايتارىپ بەرەمىن دەگەنى ءسوزى جاتتاندى ەمەس، ءوز ويىن ايتىپ وتىر، بۇل ماكەڭ ەكەۋمىزدى تەبىرەنتىپ جىبەردى", - دەپ قوستى ول.
ولارعا "حارەكەت" قورى حالىقتان جينالعان اقشاعا شىمكەنتتەن 30 ميلليون تۇراتىن 5 بولمەلى جەر ءۇي الىپ بەردى.
ودان بولەك ورازىمبەتكە 5 ميلليون تەڭگە سەرتيفيكات بەرىلدى، ول 18 جاسقا تولعانشا شەشىلمەيتىن دەپوزيت. مۇنى كەيىن وقۋىنا، ۇيلەنگەنگە جانە باسقا دا قاجەتتىلىگىنە جاراتا الادى.
9 جاسار بالانىڭ ەندىگى ارمانى - اناسىنىڭ جارىق دۇنيەنى كايتا كورگەنىن قالايدى ەكەن. قور وكىلىنىڭ سوزىنشە، الداعى دۇيسەنبىدە اناسىن دارىگەرگە كورسەتىپ، جازىلۋعا مۇمكىندىك بولسا وتا جاساتىپ بەرەدى.
سۋرەتتەر: "حارەكەت" قورىنان
