ىشكى ىستەر ءمينيسترىنىڭ بۇرىنعى ورىنباسارى ارىستانعاني زاپپاروۆ الماتى وبلىسىنىڭ پوليتسيا دەپارتامەنتىن باسشىسى قىزمەتىنە تاعايىندالدى. بۇل تۋرالى قر ىشكى ىستەر مينيسترلىگىنىڭ ءباسپاسوز قىزمەتى مالىمدەدى.
"قازىرگى كريمينوگەندىك جاعدايدى ەسكەرە وتىرىپ، كادرلىق الەۋەتتى نىعايتۋ، قىلمىسقا قارسى كۇرەستى كۇشەيتۋ، ازاماتتاردىڭ قاۋىپسىزدىگىن ءتيىمدى قامتاماسىز ەتۋ ماقساتىندا ىشكى ىستەر ءمينيسترىنىڭ بۇيرىعىمەن قر پرەزيدەنتى اكىمشىلىگىمەن كەلىسە وتىرىپ، بۇرىنعى ۆيتسە-مينيستر زاپپاروۆ ارىستانعاني راسيلحانوۆيچ الماتى وبلىسىنىڭ پوليتسيا دەپارتامەنتىنىڭ باستىعى بولىپ تاعايىندالدى", - دەلىنگەن حابارلامادا.
سونىمەن قاتار، ىشكى ىستەر ءمينيسترى ەرلان تۇرعىمباەۆ جەكە قۇرامعا ءوزىنىڭ جاڭا ورىنباسارى ەرجان سادەنوۆتى تانىستىردى.
"مەملەكەت باسشىسى ىشكى ىستەر ورگاندارىن دامىتۋعا ەرەكشە كوڭىل ءبولىپ، دەپارتامەنت الدىنا ازاماتتاردىڭ قاۋىپسىزدىگىن قامتاماسىز ەتۋ، قىلمىسپەن كۇرەسۋ جانە پوليتسيانى حالىقپەن ءوزارا ارەكەتتەسۋدىڭ سەرۆيستىك ۇلگىسىنە كوشىرۋ بويىنشا ناقتى مىندەتتەر جۇكتەپ وتىر، وسى مىندەتتەردى ورىنداڭىز", - دەدى مينيستر ەرلان تۇرعىمباەۆ.
2019 جىلدىڭ شىلدە ايىنان باستاپ ارىستانعاني زاپپاروۆ ىشكى ىستەر ءمينيسترىنىڭ ورىنباسارى قىزمەتىن اتقاردى.
ارىستانعاني زاپپاروۆ 1969 جىلى جامبىل وبلىسىندا دۇنيەگە كەلگەن. ءال-فارابي اتىنداعى قازاق مەملەكەتتىك ۋنيۆەرسيتەتىن (1993), ىشكى ىستەر مينيسترلىگى اكادەمياسىنىڭ زاڭ ينستيتۋتىن (2002) بىتىرگەن.
1993-2001 جىلدارى جامبىل جانە الماتى وبلىستارى ءىىب، الماتى قالاسى ءىىب جەدەل شتابى قىزمەتتەرىن اتقارعان.
2001 جىلدان باستاپ الماتى وبلىسى ىشكى ىستەر دەپارتامەنتىنىڭ جەدەل بولىمشەلەرىندە باسشىلىق قىزمەتتەردە جۇمىس ىستەگەن.
2010 جىلى الماتى وبلىسى ءىىد كريمينالدىق پوليتسيا باسقارماسىنىڭ باستىعى بولىپ تاعايىندالدى.
2012-2013 جىلدارى الماتى قالاسى جانە اقمولا وبلىسى ىشكى ىستەر دەپارتامەنتىنىڭ قالالىق بيلىك ورگاندارىنىڭ باسشىلارى لاۋازىمدارىن اتقارعان.
2013-2014 جىلدارى كولىكتەگى ءىىد كريمينالدىق پوليتسيا باسقارماسىنىڭ باستىعى.
2014-2016 جىلدارى ىشكى ىستەر مينيسترلىگى ىشكى قاۋىپسىزدىك باسقارماسى باستىعىنىڭ ورىنباسارى بولدى.
2016-2017 جىلدارى اقتوبە وبلىستىق ىشكى ىستەر دەپارتامەنتى باستىعىنىڭ ءبىرىنشى ورىنباسارى بولدى.
2017 جىلدىڭ جەلتوقسان ايىنان باستاپ ىشكى ىستەر مينيسترلىگى ەسىرتكى قىلمىسىنا قارسى كۇرەس دەپارتامەنتىن باسقاردى.
2019 جىلدىڭ ءساۋىر-شىلدە ايلارى ارالىعىندا قىزىلوردا وبلىسىنىڭ پوليتسيا دەپارتامەنتىن باسقاردى.
“ادىرنا” ۇلتتىق پورتالى
