«سامۇرىق-قازىنا» قورىنىڭ باسشىسى الماسادام ساتقاليەۆ قاسىم-جومارت توقاەۆتىڭ سىنىنان كەيىن جازبا جاريالادى، دەپ حابارلايدى "ادىرنا" ۇلتتىق پورتالى.
- «بۇگىن ەل باسشىلىعىنىڭ ساياسي تىلەگى ارقاسىندا "سامۇرىق-قازىنا" قورىندا قوعامدا بەلسەندى تالقىلانىپ جاتقان رەفورمالاردى جۇزەگە اسىرۋدىڭ بىرەگەي مۇمكىندىگى پايدا بولدى. ءبىز رەفورمالاۋ باعدارلاماسى جوباسىنا سىندارلى ۇسىنىستارىن بولىسۋگە دايىن بارلىق اداممەن ديالوگ جۇرگىزەمىز»، - دەپ جازدى الماسادام ساتقاليەۆ.
ونىڭ ايتۋىنشا، جاقىن ارادا بۇل جوسپارلار اشىق دەرەككوزدەردە جانە كورپوراتيۆتىك سايتتا جاريالانادى. سونداي-اق، ول كومپانيا بارلىق سۇراققا جاۋاپ بەرۋگە دايىن ەكەنىن جازدى.
- «اشىقتىق پەن ەسەپتىلىك، بيزنەس ءۇشىن كەدەرگىلەردى جويۋ، الەۋمەتتىك جاۋاپكەرشىلىك جانە سىبايلاس جەمقورلىققا قارسى كۇرەس بازالىق قاعيداتتار رەتىندە ايقىندالدى. قازاقستان رەسپۋبليكاسى ازاماتتارىنىڭ ۇلتتىق بايلىقتى ءادىل ءبولۋ ەلەمەنتى رەتىندە قور اكتيۆتەرىن يەلەنۋگە تىكەلەي قاتىسۋ مۇمكىندىگى بولۋى مۇمكىن»، - دەدى ول.
ساتقاليەۆ ەل ەكونوميكاسىنداعى ءتۇيىندى پروبلەمالاردى شەشۋ ماقساتىندا بيزنەس-پروتسەستەردى جانە قور كومپانيالارى توبىنداعى كورپوراتيۆتىك باسقارۋ پراكتيكاسىن رەفورمالاۋعا، مۇناي، گاز، كومىر، تەمىرجول كولىگى، ەلەكتر ەنەرگەتيكاسى جانە تەلەكوممۋنيكاتسيا نارىقتارىنداعى ءوزارا قارىم-قاتىناستار قۇرىلىمىن وزگەرتۋگە باعىتتالعان بىرقاتار تەڭدەسسىز شارانى ۇسىناتىنىن مالىمدەدى.
- «ءبىز ساتىپ الۋ جۇيەسىن تۇبەگەيلى قايتا قاراپ، وتاندىق تاۋار وندىرۋشىلەر مەن شاعىن جانە ورتا بيزنەستى قولداۋ تەتىكتەرىن كۇشەيتۋگە نيەتتىمىز. بۇل ماسەلەلەر بيزنەس-قوعامداستىقپەن 26 قاڭتار، سارسەنبىدە الەۋمەتتىك جەلىلەردە ونلاين-ترانسلياتسيا ارقىلى اشىق ديالوگ فورماتىندا تالقىلانادى. باعدارلاما بەكىتىلگەن جاعدايدا، مەن ونىڭ تابىستى ەنگىزىلۋىن جانە ورىندالۋىن قامتاماسىز ەتۋگە دايىنمىن. سىزدەن كورپوراتيۆتىك مەكەنجايىمىزعا ۇسىنىستاردى كۇتەمىز - usynys@sk.kz»، - دەپ جازدى ول.
"ادىرنا" ۇلتتىق پورتالى
