پرەزيدەنت ەكى ءسوزىنىڭ بىرىندە رەفورما، رەفورما دەپ جاتىر. بىراق ونى جاسايتىن مىنا ۇكىمەتتە ساياسي جىگەرى كۇشتى رەفورماتورلار بار ما؟ ماسەلەن، ۇكىمەت باسى ءاليحان سمايىلوۆ رەفورما جاسايدى دەگەنگە كىم سەنەدى؟ بۇعان دەيىنگى قىزمەتتەرىنىڭ بىرىندە ول ەل ستاتيستيكاسىمەن اينالىسىپتى. ياعني ەلگە وتىرىك تاراتۋدىڭ باسى-قاسىندا بولىپ، جالعان سويلەۋگە ابدەن شىڭدالعان شەنەۋنىكتىڭ ناق ءوزى. ەرتەڭ بۇل ۇكىمباسى قۇشاق-قۇشاق وتىرىكتەرمەن تاعى دا اۋزىمىزدى ۇرماسىنا كىم كەپىل؟
سامۇرىق-قازىنانى رەفورمالاۋ دا ميعا سيمايدى. بۇل مەكەمە ەلدى سۇلىكتەي سورعان ەلىمىزدەگى ەڭ ءىرى جەمقورلار ورداسى ەكەنى بارىمىزگە ماعلۇم. مۇنى پرەزيدەنتتىڭ ۋاقىت سوزباي تاراتقانى ابزال. قازىر وبلىستاردىڭ بيۋدجەتىنە ءوز اۋماعىنداعى ءوندىرىس ورىندارىنان كوك تيىن قارجى تۇسپەيتىنى بەلگىلى. ويتكەنى بارلىعىن سامۇرىق-قازىنا سىپىرىپ، سيىرىپ الىپ قويادى. سامۇرىق-قازىناعا قارجىنىڭ كىرگەن ءىزى بار دا، شىققان ءىزى جوق، ايداھار ءتارىزدى قىلعىپ جۇتا بەرەتىن ءبىر جۇتقىن پالە. سوندىقتان سامۇرىق-قازىنانى ەل ەكونوميكاسىنا ءتيىمسىز قۇرىلىم رەتىندە ءتۇپ ورنىمەن تىپ-تيپىل جويىپ، وبلىستاردى باياعىداي ءوز بيۋدجەتىنە يە قىلعان ءجون.
سوسىن ناعىز رەفورما جاسايتىن ورگان – پوليتسيا. مۇنى تۇبەگەيلى جاڭارتۋ كەرەك.
قاڭتار دۇربەلەڭىندە پوليتسيانىڭ نكۆد-لىك ينستينگى ويانعانىن كوردىك. قاننىڭ ءيسىن سەزگەندە قۇتىرىپ كەتەتىن اش قاسقىرلار سياقتى مىنا كۇندەرى حالىققا ايۋاندىقتىڭ نەبىر ءتۇرىن كورسەتىپ جاتقان مۇنداي پوليتسيانىڭ بارىنان – جوعى. مۇنداي پوليتسيامەن كەلەشەكتە قۇقىقتىق مەملەكەت قۇرا المايمىز.
نەگىزى كۇشتىك قۇرىلىمداردىڭ بارلىعىن – ۇقك-نەن باستاپ باتىل رەفورمالاۋ كەرەك. جالعىز كۇشتىك قۇرىلىمدارعا عانا ەمەس، جالپى مەملەكەتتىك رەفورما قاجەت. ول ءۇشىن قازاققا اتا تۇرىك سياقتى ۇلى رەفورماتور كەرەك. ەندەشە، بۇل كۇندە قازاقتا رەفورماتور بولا الاتىن تۇلعا بار ما؟ بولسا – كىمدى كورىپ تۇرسىزدار؟
"ادىرنا" ۇلتتىق پورتالى.
