قر پارلامەنت ءماجىلىسىنىڭ دەپۋتاتى ەرلان سايروۆ «قاڭتار قاسىرەتى» وقيعاسىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
«جان-جاقتان ازاماتتار «قاڭتار قاسىرەتى» وقيعالارىنان كەيىن تۇزەتۋ مەكەمەلەرىنە تۇسكەن كىسىلەرگە قيناۋ، ازاپتاۋ ادىستەرىنىڭ قولدانىپ جاتقاندىعىن جەتكىزىپ جاتىر.
ارينە، بىزگە شىندىققا جەتۋ كەرەك. بىزگە مەملەكەتتىك تۇتاستىعىمىزدى ساقتاۋدىڭ تەتىكتەرىن جاساۋ وتە ماڭىزدى! زاڭ مەن ءتارتىپ سول تۇتقانىڭ بىرەگەيى! بىراق، شىندىققا جاپپاي ۇرىپ-سوعۋمەن، قيناۋمەن جەتۋ مۇمكىن ەمەس. «اسىرا سىلتەۋ» بولىپ جاتقان ءتارىزدى. قۇقىق قورعاۋ ورىندارى مۇنداي ادىستەرگە ءۇزىلدى-كەسىلدى بارماۋى كەرەك دەپ ەسەپتەيمىن!
وندا وتىرعان كىسىلەر ءبىزدىڭ ازاماتتار، قازاق ەكەندىگىن، "بىرەۋگە باۋىر، بىرەۋگە اعا" بولاتىندىعىن، سىرتقى، ىشكى كۇشتەردىڭ ايداعىنا ىلەسىپ كەتۋى مۇمكىن ەكەندىگىن ەسكەرۋىمىز قاجەت»،– دەدى ول.
سونداي-اق دەپۋتات «اداسقان جاندارعا» مەملەكەت ءوزىنىڭ گۋمانيزمىن كورسەتۋى ابزال ەكەنىن اتاپ ءوتتى.
«ارينە، قولىنا قارۋ الىپ مەملەكەتتىك مەكەمەلەرگە وق اتقان، دۇكەندەردى توناعاندار زاڭ جۇزىندە قاتاڭ جازاسىن الۋ كەرەك. زاڭ قاتال، بىراق ول زاڭ. زاڭ مەن ءتارتىپ – مەملەكەتتىڭ باستى فۋندامەنتى. بىراق، ۇرىپ -سوعۋ، قيناۋ، ازاماتتىق قۇقىقتانى تاپتاۋعا جول بەرۋگە بولمايدى. بىزگە قازىر كەشىرىم، مەيىرىم، باۋىرلاستىق سەزىمىن كۇشەيتەتىن قادامدار وتە قاجەت.
قۇزىرلى مەكەمەلەرگە وسى ماسەلە بويىنشا جازباشا سۇراۋ جاسايتىن بولامىن»،– دەدى ول.
«ادىرنا» ۇلتتىق پورتالى
