QR Parlament májilisiniń depýtaty Erlan Saırov «Qańtar qasireti» oqıǵasyna qatysty pikir bildirdi, dep habarlaıdy «Adyrna» tilshisi.
«Jan-jaqtan azamattar «Qańtar qasireti» oqıǵalarynan keıin túzetý mekemelerine túsken kisilerge qınaý, azaptaý ádisteriniń qoldanyp jatqandyǵyn jetkizip jatyr.
Árıne, bizge shyndyqqa jetý kerek. Bizge memlekettik tutastyǵymyzdy saqtaýdyń tetikterin jasaý óte mańyzdy! Zań men tártip sol tutqanyń biregeıi! Biraq, shyndyqqa jappaı uryp-soǵýmen, qınaýmen jetý múmkin emes. «Asyra silteý» bolyp jatqan tárizdi. Quqyq qorǵaý oryndary mundaı ádisterge úzildi-kesildi barmaýy kerek dep esepteımin!
Onda otyrǵan kisiler bizdiń azamattar, qazaq ekendigin, "bireýge baýyr, bireýge aǵa" bolatyndyǵyn, syrtqy, ishki kúshterdiń aıdaǵyna ilesip ketýi múmkin ekendigin eskerýimiz qajet»,– dedi ol.
Sondaı-aq depýtat «adasqan jandarǵa» memleket óziniń gýmanızmin kórsetýi abzal ekenin atap ótti.
«Árıne, qolyna qarý alyp memlekettik mekemelerge oq atqan, dúkenderdi tonaǵandar zań júzinde qatań jazasyn alý kerek. Zań qatal, biraq ol zań. Zań men tártip – memlekettiń basty fýndamenti. Biraq, uryp -soǵý, qınaý, azamattyq quqyqtany taptaýǵa jol berýge bolmaıdy. Bizge qazir keshirim, meıirim, baýyrlastyq sezimin kúsheıtetin qadamdar óte qajet.
Quzyrly mekemelerge osy másele boıynsha jazbasha suraý jasaıtyn bolamyn»,– dedi ol.
«Adyrna» ulttyq portaly
