مۇگەدەك بالانىڭ اكەسى مەملەكەتتەن پاتەر الىپ، وتباسىن ۇيدەن قۋىپ شىقتى. ەسىكتىڭ قۇلپىن اۋىستىرىپ، جۇبايى مەن بالالارىن كورگىسى كەلمەيتىنىن ايتقان. يرينا زاۆارزينا وسى باسپانا ءۇشىن جالداپ تۇرۋ اقىسىن تولەۋگە ءماجبۇرمىن دەپ اشىنادى. سەبەبى ول كەلىسىمنىڭ كەپىلگەرى بولىپ قول قويعان، دەپ حابارلايدى “ادىرنا” ۇلتتىق پورتالى "استانا” ارناسىنا سىلتەمە جاساپ.
ساتىپ الۋ قۇقىعى بەرىلگەن جالدامالى پاتەردى يرينا زاۆارزينانىڭ وتباسى جەڭىلدىك ساناتى بويىنشا العان. كەنجە قىزىنىڭ مۇمكىندىگى شەكتەۋلى ەدى. اۋىر دەرتكە شالدىققان قىز وتىرىپ، باسىن تىك ۇستاي المايتىن. الايدا وتباسى سول كۇيى قونىس تويىن تويلاي المادى. وتاعاسى ايەلى مەن ەكى بالاسىن ۇيدەن قۋىپ شىققان.
"مەن قۇلىپتى اۋىستىردىم. كەلمەي-اق قويساڭ بولادى، ساۋ بول", - دەپ حابارلاستى. - پاتەر مەنىكى، يەسى مەن، - دەدى. قالاي سەنىكى؟ - دەيمىن. ول پاتەرگە ناشاقورلاردى جيناپ، پريتون جاساعان. كورشىلەر راستاي الادى. ەكىنشى قالالىق سوت كەلىسىمدى بۇزۋ تۋرالى تالابىمىزدى قابىلدامادى. سەبەبى اجىراسۋ كەلىسىمدى بۇزۋعا سەبەپ ەمەس", - دەيدى يرينا زاۆارزينا.
جالعا الۋ تۋرالى كەلىسىم يرينانىڭ كۇيەۋى مەن قازاقستاندىق تۇرعىن-ءۇي كومپانياسىنىڭ اراسىندا جاسالعان. قۇجاتتا پاتەردىڭ "نۇرلى جەر" باعدارلاماسى ارقىلى "مۇگەدەك بالاسى بار وتباسىعا" بەرىلگەنى انىق جازىلعان. يرينا كەپىلگەر رەتىندە قول قويعاندىقتان، ەندى باسپاناعا كەزەككە تۇرۋ قۇقىعىنىنان ايىرىلىپ وتىر.
"پاتەردى بەرگەن سوڭ، ولاردى كەزەكتەن الىپ تاستادىق. ولار باسپانامەن قامتاماسىز ەتىلدى، ءوز مۇمكىندىكتەرىن قولداندى. كەلىسىمدى بۇزعىسى، كۇيەۋىن الىپ تاستاعىسى كەلسە، قازاقستان يپوتەكالىق كومپانياسىنا جۇگىنۋى كەرەك. تەڭگەرىمدى ۇستاۋشى سولار", - دەيدى ورال قالالىق تۇكش باسپانا سەكتورى مەن جەكەشەلەندىرۋ ءبولىمىنىڭ مەڭگەرۋشىسى ەرلان شايحيەۆ.
وتباسىن ۇيدەن قۋعان يرينانىڭ كۇيەۋى ەندى پاتەر اقىسىن تولەمەي ءجۇر. دەمەك قارىزدى وتەۋ كەپىلگەردىڭ موينىنا جۇكتەلەدى. يرينا ءتۇرلى مەكەمەلەردىڭ تابالدىرىعىن توزدىرىپ شارشاعانىن ايتادى. ول ازداي، جاقىندا قىزىن جەر قوينىنا تاپسىرعان. ەكى جىلدىڭ ىشىندە "قازاقستان تۇرعىن ءۇي كومپانياسىنا" بىرنەشە رەت جۇگىنگەنىمەن، ول جاقتاعىلار تەكسەرىستى تەك تەلەارنانىڭ سۇرانىمىنان كەيىن باستاعان. رەسمي جاۋاپتا وتباسى مەن ولاردىڭ كورشىلەرىنىڭ تاراپىنان ەشقانداي شاعىم تۇسپەگەنى ايتىلعان.
"قازاقستان تۇرعىن ءۇي كومپانياسى" اق جالعا الۋشىلاردىڭ جەكە ومىرىنە ارالاسپايدى. جۇرگىزىلگەن تەكسەرىسكە سايكەس، بيىل 18 قاڭتاردا پاتەردە سانيتارلىق تالاپتاردىڭ بۇزىلعانى انىقتالعان جوق", - دەپ حابارلاندى كومپانيادان.
ال تاۋەلسىز زاڭگەرلەردىڭ پىكىرىنشە، سوت وتاعاسى مەن تۇرعىن ءۇي كومپانياسىنىڭ اراسىنداعى كەلىسىمدى جارامسىز دەپ تانۋى كەرەك ەدى. ويتكەنى اجىراسقان ەركەك وزىنە تيەسىلىدەن ارتىق شارشى مەتردە تۇرىپ جاتىر.
“ادىرنا” ۇلتتىق پورتالى
