Múgedek balanyń ákesi memleketten páter alyp, otbasyn úıden qýyp shyqty. Esiktiń qulpyn aýystyryp, jubaıy men balalaryn kórgisi kelmeıtinin aıtqan. Irına Zavarzına osy baspana úshin jaldap turý aqysyn tóleýge májbúrmin dep ashynady. Sebebi ol kelisimniń kepilgeri bolyp qol qoıǵan, dep habarlaıdy “Adyrna” ulttyq portaly "Astana” arnasyna silteme jasap.
Satyp alý quqyǵy berilgen jaldamaly páterdi Irına Zavarzınanyń otbasy jeńildik sanaty boıynsha alǵan. Kenje qyzynyń múmkindigi shekteýli edi. Aýyr dertke shaldyqqan qyz otyryp, basyn tik ustaı almaıtyn. Alaıda otbasy sol kúıi qonys toıyn toılaı almady. Otaǵasy áıeli men eki balasyn úıden qýyp shyqqan.
"Men qulypty aýystyrdym. Kelmeı-aq qoısań bolady, saý bol", - dep habarlasty. - Páter meniki, ıesi men, - dedi. Qalaı seniki? - deımin. Ol páterge nashaqorlardy jınap, prıton jasaǵan. Kórshiler rastaı alady. Ekinshi qalalyq sot kelisimdi buzý týraly talabymyzdy qabyldamady. Sebebi ajyrasý kelisimdi buzýǵa sebep emes", - deıdi Irına Zavarzına.
Jalǵa alý týraly kelisim Irınanyń kúıeýi men Qazaqstandyq turǵyn-úı kompanııasynyń arasynda jasalǵan. Qujatta páterdiń "Nurly jer" baǵdarlamasy arqyly "Múgedek balasy bar otbasyǵa" berilgeni anyq jazylǵan. Irına kepilger retinde qol qoıǵandyqtan, endi baspanaǵa kezekke turý quqyǵynynan aıyrylyp otyr.
"Páterdi bergen soń, olardy kezekten alyp tastadyq. Olar baspanamen qamtamasyz etildi, óz múmkindikterin qoldandy. Kelisimdi buzǵysy, kúıeýin alyp tastaǵysy kelse, Qazaqstan ıpotekalyq kompanııasyna júginýi kerek. Teńgerimdi ustaýshy solar", - deıdi Oral qalalyq TÚKSh baspana sektory men jekeshelendirý bóliminiń meńgerýshisi Erlan Shaıhıev.
Otbasyn úıden qýǵan Irınanyń kúıeýi endi páter aqysyn tólemeı júr. Demek qaryzdy óteý kepilgerdiń moınyna júkteledi. Irına túrli mekemelerdiń tabaldyryǵyn tozdyryp sharshaǵanyn aıtady. Ol azdaı, jaqynda qyzyn jer qoınyna tapsyrǵan. Eki jyldyń ishinde "Qazaqstan turǵyn úı kompanııasyna" birneshe ret júgingenimen, ol jaqtaǵylar tekseristi tek telearnanyń suranymynan keıin bastaǵan. Resmı jaýapta otbasy men olardyń kórshileriniń tarapynan eshqandaı shaǵym túspegeni aıtylǵan.
"Qazaqstan turǵyn úı kompanııasy" AQ jalǵa alýshylardyń jeke ómirine aralaspaıdy. Júrgizilgen tekseriske sáıkes, bıyl 18 qańtarda páterde sanıtarlyq talaptardyń buzylǵany anyqtalǵan joq", - dep habarlandy kompanııadan.
Al táýelsiz zańgerlerdiń pikirinshe, sot otaǵasy men turǵyn úı kompanııasynyń arasyndaǵy kelisimdi jaramsyz dep tanýy kerek edi. Óıtkeni ajyrasqan erkek ózine tıesiliden artyq sharshy metrde turyp jatyr.
“Adyrna” ulttyq portaly
