الماتى قالالىق پد ارنايى جانە جۇمىلدىرۋ دايىندىعى باسقارماسىنىڭ اعا ينسپەكتورى اقتان زاينولدا ارىپتەستەرىمەن بىرگە دەپارتامەنت عيماراتتارىنىڭ قورعانىسىن قالاي ساقتاپ قالعانى تۋرالى ايتىپ بەردى، دەپ حابارلايدى «ادىرنا» ءتىلشىسى polisia.kz-كە سىلتەمە جاساپ.
– 5-ءى كۇنى كەشكە ارنايى جوسپار جاريالانعاننان كەيىن ءبىز الماتى پوليتسيا دەپارتامەنتىنىڭ اكىمشىلىك عيماراتتارىن كۇزەتۋگە ارنالعان پوستتارىمىزعا تۇرا باستادىق. ءبىزدىڭ مىندەتىمىز – لاڭكەستەردىڭ پد عيماراتىنا ەنۋىنە جانە ولاردىڭ قارۋ-جاراقتى يەلەنۋىنە جول بەرمەۋ بولدى، ويتكەنى ازاماتتاردىڭ جانە جالپى ەلدىڭ قاۋىپسىزدىگىنە ۇلكەن قاۋىپ ءتونىپ تۇردى، – دەدى كاپيتان زاينولدا. پوليتسيا قىزمەتكەرىنىڭ مالىمەتىنشە، شابۋىل جاساعاندار – اۋەسقويلار ەمەس. ماسەلە جاقسى دايىندالعان شابۋىلداۋشىلار جايىندا. – لاڭكەستەر جاقسى دايىندالعان. عيمارات 4-5 جاقتان شابۋىلعا ۇشىرادى. وعان قوسا، دەپارتامەنتتىڭ جانىنان كولىكپەن ءجۇرىپ، ءبىزدىڭ نازارىمىزدى باسقا جاققا اۋداردى. سودان كەيىن قىلمىسكەرلەر بۇل كولىكتەردەن وق جاۋدىردى. مەنىڭ ورنىم ءتۇنى بويى قارۋلى شابۋىلعا تويتارىس بەرگەن ءۇشىنشى پوستتا بولدى. ءار پوليتسيا قىزمەتكەرىن جاۋىنگەرلىك پوزيتسيالارعا بولدىك، — دەدى اقتان زاينولدا.
ابىروي بولعاندا، قىلمىسكەرلەرمەن بولعان بۇل شايقاستا پوليتسەيلەردىڭ ەشقايسىسى قازا تاپقان جوق. كاپيتان بۇل ۋاقىتتا جەكە قاۋىپسىزدىگى تۋرالى ويلاماعانىن اتاپ ءوتتى. ازاماتتاردىڭ قاۋىپسىزدىگى تارازىدا بولدى.
– ءبىز ءبىر-ءبىرىمىزدى قولدادىق. قارۋلى لاڭكەستەرگە ابىرويمەن تويتارىس بەرۋ جانە ولاردىڭ قارۋدى يەلەنۋىنە جول بەرمەۋ ماڭىزدى بولدى. ءبىز بەيبىت تۇرعىندار مەن قالانى قورعاۋدى ءبىرىنشى ورىنعا قويدىق، – دەدى قۇقىق قورعاۋ ورگانىنىڭ قىزمەتكەرى.
«ادىرنا» ۇلتتىق پورتالى
