اقتوبە وبلىسى اكىمىنىڭ كابينەتى اتا-باباسى ارۋاعىنىڭ ارقاسىندا امان قالعان. جاپپاي تارتىپسىزدىك كەزىندە وڭداسىن ءورازاليننىڭ جۇمىس ورنىنا ەشكىم تيمەگەن. ءتىپتى بۇلىكشىلەر تابالدىرىعىنان دا اتتاماپتى. مۇنى باسشى تىلسىم كۇشكە بالاپ وتىر، دەپ حابارلايدى «ادىرنا» ءتىلشىسى كتك ارناسىنا سىلتەمە جاساپ.
«بىرىنشىدەن، مەنىڭ ويىمشا، قۇداي ساقتادى ما، اتا-بابانىڭ ارۋاعى ما، ءيا، ىشتەي بىلەتىن ادامدار سەسكەندى مە، بىراق تابالدىرىعىنان اتاعان جوق. اكىمنىڭ كابينەتى قانداي دا ءبىر جاراتۋشىنىڭ ارقاسىندا امان قالدى. قانشا دەگەنمەن، بيلىك كيەلى دۇنيە عوي»،– دەيدى ول.
ميتينگ باستالعالى جۇرت كوزىنە كورىنبەي كەتكەن وڭداسىن ورازالين ەكى ساعاتتىق ءباسپاسوز ءماسليحاتىن بەردى. بۇلىنبەگەن كابينەتىنەن بولەك، كوتەرىلىستىڭ قانتوگىسسىز اياقتالعانىنا شۇكىر ەتىپ وتىر. وسى ۋاقىتقا دەيىن قالادان تىس شىقپاي جۇمىس ورنىندا تاپجىلماي وتىرعانىن ايتادى. ايماقتا جاريالانعان توتەنشە جاعدايدى توقتاتۋ ءۇشىن مەملەكەت باسشىسىنا ءوتىنىش جولداعان. ەندى بىرەر كۇندە وبلىس اكىمدىگى عيماراتىنداعى قورشاۋ الىنىپ، قازىنا اقشاسىنا قايتا جوندەلەدى. ال ميتينگ كەزىندە نارازى توپپەن كەزدەسۋگە قۇلقى بولماعان. ەسەسىنە ورازالين قالا اكىمى اسحات شاحاروۆتى شەرۋگە شىققاندارمەن جۇزدەسۋگە جۇمسادىم دەپ وتىر.
اقتوبە وبلىسىنىڭ باسشىسى وسى قىزمەتكە تاعايىندالعان ءۇش جىل ىشىندە ءوتىنىش ايتا كەلگەن نارازى توپتىڭ بىردە-ءبىرىن قابىلداماعان ەكەن.
«مەن ءۇش جىلدان بەرى، وسى جەرگە كەلگەننەن بەرى، وزدەرىڭ كورگەن شىعارسىڭدار، بىردە-ءبىر وسىنداي زاڭسىز ارەكەتكە بارىپ، شىققان دا جوقپىن. تۇسىنىكتەمە بەرگەن دە جوقپىن. بۇل مەنىڭ ۇستانعان قاعيداتىم دەدىم عوي. مىنا زاڭسىز ارەكەتكە جينالعان، زاڭسىز تالاپ قويعاندارمەن ءبارى دە زاڭعا قايشى كەلدى. تالاپتارى مەملەكەتتىك قۇلاتۋ بولدى. سوندا مەن سول جەرگە شىعىپ، ۋادە بەرۋىم كەرەك پە؟»– دەپ ءسوزىن تولىقتىردى اكىم.
«ادىرنا» ۇلتتىق پورتالى
