Aqtóbe oblysy ákiminiń kabıneti ata-babasy arýaǵynyń arqasynda aman qalǵan. Jappaı tártipsizdik kezinde Ońdasyn Orazalınniń jumys ornyna eshkim tımegen. Tipti búlikshiler tabaldyryǵynan da attamapty. Muny basshy tylsym kúshke balap otyr, dep habarlaıdy «Adyrna» tilshisi KTK arnasyna silteme jasap.
«Birinshiden, meniń oıymsha, qudaı saqtady ma, ata-babanyń árýaǵy ma, ıá, ishteı biletin adamdar seskendi me, biraq tabaldyryǵynan ataǵan joq. Ákimniń kabıneti qandaı da bir Jaratýshynyń arqasynda aman qaldy. Qansha degenmen, bılik kıeli dúnıe ǵoı»,– deıdi ol.
Mıtıng bastalǵaly jurt kózine kórinbeı ketken Ońdasyn Orazalın eki saǵattyq baspasóz máslıhatyn berdi. Búlinbegen kabınetinen bólek, kóterilistiń qantógissiz aıaqtalǵanyna shúkir etip otyr. Osy ýaqytqa deıin qaladan tys shyqpaı jumys ornynda tapjylmaı otyrǵanyn aıtady. Aımaqta jarııalanǵan tótenshe jaǵdaıdy toqtatý úshin Memleket basshysyna ótinish joldaǵan. Endi birer kúnde oblys ákimdigi ǵımaratyndaǵy qorshaý alynyp, qazyna aqshasyna qaıta jóndeledi. Al mıtıng kezinde narazy toppen kezdesýge qulqy bolmaǵan. Esesine Orazalın qala ákimi Ashat Shaharovty sherýge shyqqandarmen júzdesýge jumsadym dep otyr.
Aqtóbe oblysynyń basshysy osy qyzmetke taǵaıyndalǵan úsh jyl ishinde ótinish aıta kelgen narazy toptyń birde-birin qabyldamaǵan eken.
«Men úsh jyldan beri, osy jerge kelgennen beri, ózderiń kórgen shyǵarsyńdar, birde-bir osyndaı zańsyz áreketke baryp, shyqqan da joqpyn. Túsinikteme bergen de joqpyn. Bul meniń ustanǵan qaǵıdatym dedim ǵoı. Myna zańsyz áreketke jınalǵan, zańsyz talap qoıǵandarmen bári de zańǵa qaıshy keldi. Talaptary memlekettik qulatý boldy. Sonda men sol jerge shyǵyp, ýáde berýim kerek pe?»– dep sózin tolyqtyrdy ákim.
«Adyrna» ulttyq portaly
