قر ەڭبەك جانە حالىقتى الەۋمەتتىك قورعاۋ مينيسترلىگى 50 مىڭ سىياقى بەرىپ جاتقانى راس پا؟ - فاكتچەك

15042
Adyrna.kz Telegram

سوڭعى ۋاقىتتا WhatsApp مەسسەندجەرىنىڭ قولدانۋشىلارى ەڭبەك جانە حالىقتى الەۋمەتتىك قورعاۋ مينيسترلىگىنەن “2022 جىلعا ارنالعان قولداۋ قورى” دەگەن ءسوز تىركەستەرى كەزدەسەتىن SMS حابارلاما الا باستادى. راسسىلكاعا وتسەڭىز، كىشىگىرىم ساۋالناما تولتىرۋ ارقىلى 50 مىڭ تەڭگە كولەمىندە سىياقى الۋعا بولاتىنىن كورەسىز.

الاياقتاردىڭ WhatsApp-تاعى كەزەكتى فەيك تاراتىلىمى ما؟ سحەما بويىنشا كورسەتىلگەن سىلتەمەگە ءوتىپ، بىرگە تەكسەرىپ كورەيىك.

نازار اۋدارىڭىز! اقپاراتتىق قاۋىپسىزدىككە قاتىستى ماسەلەلەردى بولدىرماۋ ءۇشىن بۇل قادامداردى قايتالاۋدى ۇسىنبايمىز.

كۇدىك تۋدىراتىن #1 فاكتور: وتە كۇماندى سىلتەمەگە - https://jvip8kt.top/i/day100/?g=1 ءوتۋ ۇسىنىلادى. ەڭبەك جانە حالىقتى الەۋمەتتىك قورعاۋ مينيسترلىگىنەن شىنىمەن سىياقى بەرىلەتىن جاعدايدا، پايدالانۋشىلارعا مينيسترلىكتىڭ رەسمي سايتىن ۇسىنار ەدى.

سىلتەمەنى باسقاننان كەيىن ءبىز اۆتوماتتى تۇردە باسقا دومەنگە قايتا باعىتتالامىز: https://ldvipxrtfb.xyz/whatsapp/day100/ g=1&t=1642053825309 جانە بارلىق كەلەسى ارەكەتتەر وسى سايتتا ورىن الادى.

سايت اشىلعان بەتتە بىزگە: “قۇتتىقتايمىز! بۇگىن، 2022 جىلدىڭ 13 قاڭتارىندا ءسىز ءبىزدىڭ ساۋالناماعا قاتىسۋ ءۇشىن تاڭدالدىڭىز. ءبىر مينۋتتان كەيىن ءسىز 50 000 تەڭگە كولەمىندە سىياقى الاسىز. ءبىز ساۋالناما قاتىسۋشىلارى ءۇشىن ماراپاتتار دايىندادىق. بۇل ساۋالناماعا جاۋاپ بەرۋگە بار بولعانى 4 مينۋت 18 سەكۋندىڭىز بار! اسىعىڭىزدار، اقشالاي سىياقىلار سانى شەكتەۋلى!” - دەپ حابارلايدى.

نازار اۋدارىڭىز، بۇل اقپارات حابارلامادا بولعان اقپاراتقا سايكەس كەلمەيدى. بىزدەن تالاپ ەتىلەتىن ەندىگى نارسە — كورسەتىلگەن 4 سۇراققا جاۋاپ بەرۋ جانە سىيلىق قوراپشالارىن تابۋ. تەستتەن ءوتىپ، بارلىق سۇراقتارعا جاۋاپ بەرگەننەن كەيىن بىزگە 9 نۇسقادان تۇراتىن جۇلدە قورابىن 3 مۇمكىندىك ارقىلى تابۋ ۇسىنىلادى.

وسىدان كەيىن بىزگە 50.000 تەڭگە بونۋس جەڭىپ العانىمىزدى حابارلايدى.

الايدا، جۇلدەنى الۋ ءۇشىن WhatsApp-تاعى كونتاكتىلەرگە سىيلىق ۇتىپ الۋعا شاقىرۋ ءۇشىن بىرقاتار ارەكەتتەردى ورىنداۋ قاجەتتىلىگى ايتىلادى.

حابارلاما تاراتىلۋىنا قاراي سۋرەتتە كورسەتىلگەن كوك ينديكاتور جولاعى تولتىرىلادى. ونى تولتىرۋ ءۇشىن كەمىندە 5 توپقا جانە كەم دەگەندە 20 پايدالانۋشىعا شاقىرۋ جىبەرۋ كەرەك. وسىدان كەيىن تىركەۋدى اياقتاۋ تۋرالى ۇسىنىس پايدا بولادى.

تىركەۋدەن وتۋگە جانە كورسەتىلگەن سىلتەمەنى باسۋعا تىرىسقاندا، 404 Not Found قاتە سىلتەمە دەگەن اقپارات شىعىپ، سايكەسىنشە سايت ارى قاراي اشىلمايدى.

🔍 ەندى ldvipxrtfb.xyz دومەنى كىمگە تيەسىلى ەكەنىن تەكسەرىپ كورەلىك. تەكسەرۋ بارىسىندا سايتتىڭ 2022 جىلدىڭ 12 قاڭتارىندا تىركەلگەنىن انىقتادىق. سايت اقش-تىڭ NameSilo ۇيىمىنا تيەسىلى. ياعني، تىركەۋ يەسى: اقش- تا، ونىڭ ىشىندە اريزونا شتاتى، فينيكس قالاسىندا تۇرادى. وسىدان كەيىن-اق ەڭبەك جانە حالىقتى الەۋمەتتىك قورعاۋ مينيسترلىگىنىڭ ءدال وسى دومەنگە جانە جالپى تاراتۋعا قاتىسى بار ەكەنى ۇلكەن سۇراق تۋدىرادى.

 

تەستىلەۋ ناتيجەسى كورسەتكەندەي، الاياقتار تاڭبالاردىڭ كەزدەيسوق كومبيناتسياسىن بىلدىرەتىن دومەن اتاۋلارىنىڭ تۇتاس جيىنتىعىن پايدالانادى. بارلىق دومەندەر ءبىر كۇندە جانە ءبىر بايلانىس ادامىمەن تىركەلەتىنى انىقتالدى.

🔴 ۇكىم: مانيپۋلياتسيا جانە جالعان

WhatsApp-تاعى 50 مىڭ تەڭگە سىياقى تاراتۋ حابارلاماسىنىڭ قر ەڭبەك جانە حالىقتى الەۋمەتتىك قورعاۋ مينيسترلىگىنە ەشقانداي قاتىسى جوق.

تاراتۋ (راسسىلكا) ينتەرنەت-الاياقتىق/فيشينگ ساناتىنا جاتادى. الاياقتار ءموبيلدى قۇرىلعىدا نەمەسە كومپيۋتەردە بىرقاتار مانيپۋلياتسيالار جاساي وتىرىپ، جەلى قولدانۋشىلارىنىڭ جەكە اقپاراتىنا، سونىڭ ىشىندە بانك / نەسيە كارتاسىنىڭ دەربەس دەرەكتەرىنە قول جەتكىزۋگە مۇمكىندىك الادى.

 

زارينا اشىربەك،

"ادىرنا" ۇلتتىق پورتالى

پىكىرلەر