Оңтүстік Корея президенті Юн Сок Ёльге елден шығуға тыйым салынды, деп хабарлайды «Адырна» тілшісі Yonhap агенттігіне сілтеме жасап.
Шетелдік БАҚ-тың мәліметінше, шешімді әділет министрлігі қабылдаған. Оған жоғары лауазымды адамдар арасындағы сыбайлас жемқорлықты тергеу басқармасының басшысы жүгінген.
Қазіргі таңда Юн Сок Ель «мемлекетке опасыздық жасады» және «билікті асыра пайдаланды» деп айыпталып отыр.
Еске салайық, бұған дейін Оңтүстік Корея президенті «әскери жағдай» жариялағаны үшін елден кешірім сұраған болатын.
Сенбі күні Юн Сок Ельге импичмент мәселесі парламентте қаралып, билік басындағы партия оппозиция ұсынысының өтуіне кедергі жасады.Десе де, билікке бәсекелес Демократиялық партия басшыға қарсы импичмент жариялауды талап ететін тағы бір арыз түсіретінін мәлімдеді.
