"Adyrna" aqparattyq agenttiginiń uıymdastyrýymen 2021 jyldyń ár saladaǵy úzdikteri áleýmettik jelide saýalnama arqyly anyqtaldy. Atalǵan saýalnamalardyń ishindegi eń qyzyqty, tartysty ótkeni, barynsha kópshilik qaýymdy qamtyǵany "Jyldyń úzdik depýtaty" atalymy boldy. Bir apta boıy júrgen saýalnama nátıjesinde Qazybek Isa "2021 jyldyń úzdik depýtaty" atalymyn jeńip aldy.
Atalǵan saýalnamada Qazybek Isa Men Erlan Saırov ózara teń daýys jınap, jankúıerleriniń kóptigimen kópshilikti tań qaldyrdy. Qorytyndy shyǵarýǵa bir kún qalǵanda Erlan Saırov birshama daýyspen alda kele jatqan Qazybek Isaǵa jolyn berip, qurmet kórsetti.
Aıta ketý kerek, Qazybek Isa — qazaq tili úshin shyryldap otqa da, sýǵa da túsip, eldegi birqatar máselelerdi kópshilikke jetkizip júrgen naǵyz azamat.
"Adyrna" aqparattyq agenttiginiń bas redaktory Arman Áýbákir "Jyldyń úzdik depýtaty" atalymyna ıe bolǵan Qazybek Isaǵa marapatyn tabystap, eldiń alǵysyn jetkizdi. El aǵasyna marapatyńyz qutty bolsyn deımiz!
"Adyrna" ulttyq portaly
