Shymkent qalasynyń ákimi Murat Áıtenov Saıram turǵyn alabyndaǵy №4 balalar úıine arnaıy baryp tárbıelenýshiler ázirlegen jańajyldyq merekeniń qonaǵy boldy. Qala basshysy balalar men tárbıeshilerdi kele jatqan Jańa jyl merekesimen quttyqtap, aqjarma tilegin jetkizdi.
Shahar basshysy balalarǵa el Táýelsizdigi týraly áńgimelep, memleketimiz árbir azamattyń bilimdi, salaýatty bolýy úshin barlyq ıgiliktermen qamtyp otyrǵanyn, jańa mektepter, sport jáne oıyn alańshalary salyp jatqanyn atap ótti.
«Barlyqtaryńdy Jańajyl merekesimen quttyqtaımyn! Sender erkin eldiń azamatysyńdar. Táýelsizdik arqyly Otanymyz qýatty elge aınalýda. Elimizdiń jarqyn bolashaǵy ózderińmen baılanysty. Sendermen birge Shymkent qalasy ósip-órkendep keledi. Qalamyzdyń basty baılyǵy – ol turǵyndary. Qalamyzǵa árqashan bilimdi, bilikti mamandar kerek. Sondyqtan jaqsy oqyńdar, talapty bolyńdar. Ómirleriń tabysty bolsyn! Bolashaqtaryń baıandy bolsyn! Jańa jyl árbirińe jaqsylyǵymen kelsin!»,-dedi M.Áıtenov.
«Jarqyra, jaına jańa jyl – Táýelsiz qazaq elinde» taqyrybynda ótken meıramda barlyq balalarǵa syılyqtar men táttiler úlestirildi. Merekelik kesh ertegi keıipkerlerdiń qoıylymymen jáne ásem áýenmen jalǵasyn tapty.
1957 jyly qurylǵan mekeme 2014 jyly Shymkent qalasy № 4 balalar úıi mekemesi bolyp qaıta tirkeldi. Munda 73 bala memleket qamqorlyǵyna alynyp, tárbıelenýde.
Shymkent qalasy ákimdiginiń baspasóz qyzmeti
