Búgin, 27 jeltoqsanda Almaty qalasynda Qazaqstan Táýelsizdiginiń 30 jyldyǵyna oraı Aqparat jáne qoǵamdyq damý mınıstrliginiń uıymdastyrýymen 9 tarıhı telehıkaıalardyń tanystyrylymy ótti.
Ult qaıratkerleri Ahmet Baıtursynuly, Jumabek Táshenev, Qanysh Sátbaev, Muqaǵalı Maqataev, Jáńgir han men Domalaq ananyń ómirine arnalǵan 6 tarıhı týyndy «Qazaqstan» arnasynyń efırinen Táýelsizdik merekesi qarsańynda kórsetile bastady. Al aty ańyzǵa aınalǵan KSRO Halyq ártisi jáne Halyq qaharmany Roza Baǵlanovanyń ónegeli ómiriniń jarqyn sátteri men qıyn kezeńderin baıandaıtyn «Bulbul» telehıkaıasyn kórermender «Habar» arnasynyń efırinen kóre alady. Sondaı aq «Almaty TV» telearnasy ómiriniń sońyna deıin elim-jerim dep ezilgen ójet kúresker Turar Rysqulovtyń ómir jolyn baıandaıtyn «Qyzyl jebe» teleserıalyn túsirse, «31 telearna» uly aqyn Jambyl Jabaev pen jas reper Jambonyń taǵdyryna arnalǵan «Júrek jyry» teleserıalyn kórermenge usynyp otyr.
Sharaǵa QR Memlekettik hatshysy Q.Kósherbaev, QR Aqparat jáne qoǵamdyq damý mınıstri A.Balaeva, medıamenedjerler, zııaly qaýym ókilderi men jýrnalıster qatysty.
«Kıno – urpaq sanasyn qalyptastyratyn ıdeologııalyq qural. Jahandaný dáýirinde ómir súrip, álemdik mádenıettiń myń san boıaýy bir arnada aralasyp ketken zamanda esik-terezemizdi qymtap, órkenıetten bólektenip ómir súre almasymyz anyq. Osy rette ulttyq ıdeologııamyzdy nasıhattaýda, urpaqqa ulaǵatty tárbıe berýde, ulttyq sıpatymyzdy tanytýda kıno óneriniń alar orny erekshe. Sondyqtan Memleket basshysy Qasym-Jomart Kemeluly Toqaev «Táýelsizdik bárinen qymbat!» maqalasynda atalǵan salaǵa aıryqsha basymdyq berdi. Prezıdent maqalasynda «Men quzyrly organdar men otandyq telearnalarǵa memlekettik tapsyrystyń belgili bir bóligin mindetti túrde tarıhı taqyryptarǵa baǵyttaýdy tapsyramyn» degen bolatyn» - dedi sharanyń ashylýynda QR Memlekettik hatshysy Qyrymbek Kósherbaev
Shara barysynda arnaıy uıymdastyrylǵan dóńgelek ústel barysynda qatysýshylar otandyq serıal naryǵynyń búgini men erteńi jaıly sóz qozǵap, ózekti máleselerdi talqylady. QR Aqparat jáne qoǵamdyq damý mınıstri Aıda Balaeva qazaqstandyq teleserıaldardy túsirý baǵytynda anyqtalǵan problemalardy atap ótip, onyń sheshý joldaryn usyndy.
«Otandyq teleserıaldar túsirý jobasyna Mádenıet jáne sport mınıstrligi janynan qurylǵan Ulttyq kınony qoldaý memlekettik ortalyǵynyń áleýetin paıdalaný. Bul birinshi kezekte qarjy jetispeýshiligine baılanysty máseleni sheshýge birden bir septigin tıgizer edi. Ekinshiden, memlekettik aqparat tapsyrysy sheńberinde bólinetin qarjyny úsh jyldyq bıýdjet formatyna aýystyrý. Bul tarıhı týyndylardy túsirýge jetkilikti ýaqyt berip, túsirilim barysynda týyndaǵan máselelerdi sapaly sheshýge oń yqpal eter edi. Taǵy bir atap ótetin másele tarıhı týyndylar túsirýge qajetti rekvızıtterdiń jetispeýshiligi jıi oryn alady. Bul rette, «Qazaqfılmniń» balansyndaǵy kostıýmder men dekoraııalardy jeńildikpen nemese tegin paıdalaný múmkindigi qarastyrylsa. Búginde olardy serıaldarǵa qoldaný úshin qomaqty tólemaqy talap etiledi. Bul de óz kezeginde bólingen qarjyǵa aıtarlyqtaı salmaq salady» -dedi mınıstr óz sózinde.
Dóńgelek ústelden keıin shara qatysýshylaryna geolog-ǵalym, ınjener, mınerologııa ǵylymdarynyń doktory, professor, akademık Qanysh Sátbaevtyń ómiri men eńbek jolyna negizdelgen «Qanysh. Qazyna» teleserıalynyń 1-shi serııasy kórsetildi. Al telekórermender «Qanysh. Qazyna» serıalyn «Qazaqstan» ulttyq arnasynyń efırinen búgin saǵat 20:35 tamashalaı alady.
"Adyrna" ulttyq portaly
