Memlekettik qyzmet isteri agenttiginiń basshysy Anar Jaıylǵanova zańǵa memlekettik qyzmetkerler jumystan bos ýaqytynda qosymsha tabys tabýǵa ruqsat etiletin túzetýler ázirlenip jatqanyn málimdedi, dep habarlaıdy "Adyrna" ulttyq portaly.
OKQ brıfıngi barysynda jýrnalıster Jaıylǵanovadan memlekettik qyzmetshilerge negizgi jumysynan basqa qosymsha tabys tabý múmkindigi týraly surady.
- Qazirgi ýaqytta zańnamada mundaı norma joq, biraq bolashaqta ondaı normany engizýdi kózdeımiz. Túzetýlerdi ázirlep jatyrmyz, - dedi agenttik basshysy.
Anar Jaıylǵanova bul sheneýnikterge bıznespen aınalysý múmkindigin berý emes ekenin túsindirdi.
- Kásipkerlik emes. Bul qosymsha jumys týraly. Mysaly, bos ýaqytynda taksı júrgizýshisi bolyp jumys isteı alady. Sonymen qatar, eger otbasyn asyraý úshin qosymsha qarjy qajet bolsa, tabys taba alady. Qazir túzetýler daıyndalyp jatyr. Bul áli qabyldanbaǵan norma. Kásipkerlikpen aınalysýǵa tyıym salynady, - dedi ol.
"Adyrna" ulttyq portaly
