«Adyrna» ulttyq portaly 2021 jyl boıynsha óz salasynyń úzdikterin anyqtady. «Jyl úzdikterin» anyqtaý áleýmettik jeli paraqshalaryndaǵy daýys berý arqyly iske asty. Birneshe baǵyt boıynsha uıymdastyrylǵan saýalnama bir apta boıy júrgizildi.
«2021 jyldyń úzdik depýtaty» bolyp Májilis depýtaty Qazybek Isa atandy. Qazybek Isa Parlament minberinen memlekettik tildi damytý, jer-sý ataýlaryna tarıhı ataýlaryn qaıtarý, Alash arystaryn ulyqtaýǵa qatysty ótkir usynystar jasap júr.
«2021 jyldyń úzdik ustazy» - Aıatjan Ahmetjanuly. Aıatjan Ahmetjanuly respýblıkalyq «Qazbilim» ortalyǵynyń negizin qalaýshy, Nur-Sultan qalasy Qaıym Muhamedhanov atyndaǵy 90-gımnazııanyń dırektory, ustaz, hımık.
«2021 jyldyń úzdik qarjy sarapshysy» - Maqsat Halyq. Maqsat elimizge belgili ekonomıst, qarjy salasynda ótkir boljamdar jasap, elimiz úshin Eýrazııalyq Ekonomıkalyq Odaqtyń tıimsiz ekenin qarjylyq esepteýler arqyly kórsetip júr.
«2021 jyldyń úzdik saıası sarapshysy» - Dosym Satpaev. Belgili saıasattanýshy, birneshe kitaptyń avtory, el tarıhyna qatysty eńbekterdi basyp shyǵarýǵa atsalyp júrgen qaıratker.
«2021 jyldyń úzdik kúreskeri» - Aron Atabek. Aron Atabek "Shańyraq oqıǵasy" boıynsha dıssıdent atanyp, 15 jylyn túrmede ótkizgen kúresker. 2021 jyldyń 1-qazanynda densaýlyǵyna baılanysty abaqtydan bosatylyp, 24-qarashada kóz jumdy.
«2021 jyldyń úzdik sportshysy» - Sáken Bıbosynov. Sáken boksshy, asa jeńil salmaqta óner kórsetedi. Qazaqstan Respýblıkasynyń eńbek sińirgen sport sheberi. 2020 jylǵy Olımpıada oıyndarynyń qola júldegeri, 2019 jylǵy álem chempıonatynyń qola júldegeri. 2021 jyly Belgradta ótken álem chempıonatynda altyn júldege ıe boldy.
«2021 jyldyń úzdik jýrnalısi» - Nartaı Aralbaıuly. Jýrnalıst, «Qazaqstan» telearnasyndaǵy birneshe baǵdarlamanyń júrgizýshisi, arnaıy YouTube kanaly arqyly saraptamalyq sholý jasaıdy.
«2021 jyldyń úzdik mınıstri» - Ashat Aımaǵambetov. Memleket qaıratkeri, 2019 jyl 13 maýsymnan bastap Qazaqstan Respýblıkasy Bilim jáne ǵylym mınıstri. Eldegi bilim salasyna reforma jasaýda.
«2021 jyldyń úzdik til janashyry» - Rýza Beısenbaıtegi. Memlekettik tildi kóterý boıynsha belsendi, til janashyry.
«Ultym dep soqqan júrek – 2021» - Qýat Ahmetov. Qýat "Til Maıdany" atty YouTube arnasymen memlekettik tildiń saýda ortalyqtarynda durys saqtalýyn teksergen til janashyry, belsendi. Reseı qysymynyń áserinen Qazaqstannan ketýge májbúr bolǵan azamat.
"Adyrna" ulttyq portaly
