Astanadaǵy Sáken Seıfýllın mýzeıinde aqyn shyǵarmashylyǵyna arnalǵan ıgi is-shara ótti. Sharaǵa aqyn shyǵarmashylyǵyn zerttep júrgen ǵalymdarmen qatar, aqyn-jazýshylar, qoǵam qaıratkerleri, jýrnalıster, ánshiler qatysty
S.Seıfýllın mýzeıiniń dırektory, belgili aqyn, Memlekettik syılyqtyń ıegeri Nesipbek Aıtuly Sáken jaıly kitaptyń jaryqqa shyǵýy men aqyn músininiń jasalýy jaıly toqtaldy.
"Qarashańyraqta uly aqyn Sákenniń rýhyna arnalǵan kóptegen sharalar ótip jatyr. Búgin úsh shara ótkizeıik dep otyrmyz. Birinshisi – Sákenniń farfordan jasalǵan músininiń ashylý saltanaty. Ekinshisi – «Tar jol, taıǵaq keshý» romanyna tekstologııalyq taldaý. Bıyl úshinshi jyl «Syr sandyq» serııasymen kitaptar shyǵaryp jatyrmyz. Birinshi kitap «Kórgenderdiń kózimen, Sákenniń salǵan izimen» degen ataýmen jaryq kórdi. Ekinshi kitapty Sákendi zertteýshi uly ǵalym Tursynbek Kákishuly aǵamyz týraly estelikterdi jınaqtap, ol kisiniń ómirden ótkeniniń bir jyldyǵy qarsańynda shyǵardyq. Odan keıingi úshinshi kitap «Tar jol, taıǵaq keshýdiń» tekstologııalyq taldaý kitabynyń boıaýy áli kepken joq, keshe ǵana qolymyzǵa aldyq. «Tar jol, taıǵaq keshýdiń» alǵashqy nusqasy men keıin baspa betin kórgen nusqalarynyń arasynda kóptegen ózgerister bolǵan. Túpnusqa men keıin jarııalanǵan kitaptardyń arasynda aıyrmashylyq bar. Sony saralap, bizdiń qyzdarymyz 2 jyl otyrdy, kóp eńbek sińirdi, aıyrmashylyǵyn anyqtady. Bir kitap bolady dep oılaǵan edik. Bir kitapqa syımaı qaldy. Sondyqtan jartysyn bıyl, kitaptyń jalǵasy «Syr sandyqtyń» tórtinshi kitaby bolyp kelesi jyly shyǵady. Kitaptyń ańdatpasyn jazǵan – Erkegúl Aryqqaraqyzy, alǵysózin úlken ǵalym, sákentanýshy Kúlásh Ahmetova jazdy. Kitapqa Oralbaı Ábdikárimov pen Sáken Seıfýllın demeýshilik jasady", - deıdi Nesipbek Aıtuly.
Sáken Seıfýllınniń farfordan jasalǵan músinin qoǵam qaıratkeri Oralbaı Ábdikárimov pen mýzeıdiń alǵashqy dırektory Roza Asylbekova ashty. Músin aqynnan aınymaıdy, kostıýmine deıin aınytpaı salyp, syrtynan qazaqı shapan kıgizgen eken. Sharaǵa jınalǵan qaýymnyń uzaq qol shapalaqtap qurmet kórsetkeninen-aq músinniń kópshiliktiń kóńilinen shyqqanyn baıqaýǵa bolady. Bul oıdy sákentanýshy ǵalym Kúlásh Ahmetova da quptady.
"Sákenniń eskertkishi Alash azamattarynyń, qazaqtyń úlken tulǵalarynyń ishinde kóp qalalarda qoıyldy. Sonyń ishinde Sáken mýzeıiniń aýlasynda bir eskertkish, ishinde bir eskertkish bolyp tursa, artyq etpeıdi. Bul naǵyz Sákenniń Sáken ekenin kórsetetin eskertkish eken. Muny Nesipbek Aıtulynyń mýzeıdi basqaryp otyrǵan jyldardaǵy jemisti eńbeginiń bir parasy dep bilemin. Urpaqqa mura bolyp qalatyn shyn mánindegi rýhanı mura bolsa, sol rýhanı dúnıeniń biri – osy eskertkish", - dedi Kúlásh Ahmetova.
Budan keıin «Tar jol, taıǵaq keshý» romanynyń tekstologııalyq mátinine taldaý jasalǵan kitaptyń tusaýyn ataqty jazýshy, qoǵam qaıratkeri Sultan Orazalın men sákentanýshy ǵalym Kúlásh Ahmetova kesti. Tusaýkeserden keıin sóz alǵan jazýshy Sultan Orazalın Sáken eskertkishiniń sátti shyqqanyn aıtty.
"Dál mynandaı eskertkishti osyǵan deıin kórgenim joq. Sákenniń shyn tulǵasy, naǵyz beınesi osy eskertkish arqyly jarqyn kóringendeı. Osynda kelerde basyn qoıyp qoıa ma, keýdesine deıin músindeı me dep kelip edim. Qazirgi eskertkishter sondaı ǵoı. Mynaý bir tosyn nárse eken. Qutty bolsyn!", – dedi músin jaıly jyly lebizin bildirgen jazýshy.
Al Sáken murasyna janashyrlyq tanytyp júrgen qoǵam qaıratkeri Oralbaı Ábdikárimov Sákenniń artynda qalǵan murasynyń túgendelýin erekshe atap ótti.
"Kitaptyń qundylyǵy – sol zamannyń eshqandaı qospasyz týra kórinisi. «Tar jol, taıǵaq keshý» – qazaq ádebıetindegi memýarlyq birinshi roman. Ártúrli saıası ıdeologııaǵa baılanysty ózgertýler engizilgen, keıbir tustary alynyp tastaǵan edi. Al endi qaz-qalpynda, sol kúıi jarııalanyp otyr. Qazirgi urpaq ótken zamannyń naǵyz aqıqatyn osy kitaptan oqıtyn bolady dep oılaımyn", - dedi Oralbaı Ábdikárimov.
Búkil ómirin Sákenge arnap, Sákenniń mýzykalyq murasyn zerttep, kitaptar jazyp, ánderin nasıhattap júrgen Serik Ospanovtyń 60 jyldyq mereıtoıy da atalmysh shara qarsańyna dál kelgen eken. Mýzeı dırektory mereıtoı ıesine shapan jaýyp, arnaıy quttyqtady. Osylaı Sákenge qurmet kórsetip júrgen azamattyń ózine de qurmet kórsetildi.
Budan keıin sóz alǵan belgili ánshi Qaırat Baıbosynov eskertkish týraly «Sákenniń ózinen aýmaıdy, tek boıy Nesipbekke uqsap ketipti» dep ázildep, mýzeı qoryna ustazdarynan úırengen, jan-jaqtan jınaǵan ánderiniń sózi jarııalanǵan kitapty syıǵa tartty.
S.Seıfýllın mýzeıiniń alǵashqy dırektory Roza Asylbekova ulylarymyzdyń amanatyna adaldyq jóninde áńgimelese, dástúrli ánshi, akter, Qanat Júnisov aqynnyń tulǵasy týraly, aqyn Baýyrjan Qaraǵyzuly Sáken Seıfýllın murasynyń "Ádebıet portalyndaǵy" nasıhaty aldaǵy ýaqytta qalaı órbıtini jóninde aıtyp, aǵa býynnyń yqylasyna bólendi.
baq.kz
