Kóktem saıyn qazaq qoǵamynda qos taqyryp qaıyra kóterilip, qoıyrtpaqtanady da jatady. Birinshisi, 14 aqpan - «áýlıe Valentın kúni», ekinshisi, 8 naýryz - Halyqaralyq áıelder kúni. Shyntýaıtyna kelgende, bul atalǵan qos meıramnyń da tarıhy jetisip turǵan joq. Onyń ústine ekeýi de qazaqqa jat, zorlyqpen tańylǵan datalar. Orystildi nemese orysqol qazaq baýyrlarym, árıne, keńirdekterin sozyp, ýáj aıta jatar, biraq, báribir, báriniki bos sóz, qur qoqan-loqqy...
«Ura berseń, saıtan da óledi» demekshi, áýlıeniń kúni kúńgirttene bastaǵan syńaıly, tek basyna orysshyldyq ótip ketip, júregine qara daq salǵan topalań tobyr ǵana 14 aqpanda qoldaryna júrektiń sýreti salynǵan tıtimdeı otkrytkalaryn ustap, alaqtap júredi...
Eń qıyndaýy, 8 naýryzdyń náýbeti bolyp tur. Aǵa býyn aıyqpastaı ýlanyp, orta býyn ońbaı omaqasqan, tipti, jas býynnyń býynyna túsip ketken Áıelder kúni, bir qaraǵanda, zııan-zobalańnan ada, jaımashýaq kóktemniń kóńildi betashary sekildi. Deı turǵanmen, 8 naýryzdyń tarıhy da taramystanyp jatyr.
Tek, anaǵa degen qurmet qana qazaqtyń tilin kúrmeltip, ekpinin eńseletip otyr.
Negizi, 8 naýryz - gúl satýshylardyń naǵyz meıramy. Sirá, osy bıznestiń ókilderi osy bir-aq kúnde bir jyldyq qoryn jınap alatyn shyǵar. Qurban aıtynda qoı saýdalaýshylar o dúnıeniń saýabynan góri, bu dúnıeniń qalaýyna jeńilip jatsa, 8 naýryzda gúl satýshylardyń qudaıy berip qalady. Qyzǵanysh joq, eńbek etken eselep jesin, biraq, taǵy da uıat pen ımandy attap ketetinimiz qalaı?!. Qaltasy juqa bir-aq tal gúl alǵanǵa alara qarap, qaltasy men qarny qampıyp, birneshe kárzińke gúl shoǵyrlaryn saýdalaǵannyń aldynda qurdaı jorǵalaıtynymyz qalaı?..
«Meıramnyń tarıhy» demekshi, 8 naýryz týraly oıyn bildirgen belgili telejýrnalıst Serik ABAS-ShAH aǵamyz kógildirler men erkekshoralardyń oılary men qoldarynan shyqqan zattardy erkin qoldana berýge shaqyrypty. Menińshe, «spornyı vopros»...
Daýsyz másele, 8 naýryz jaıly qazaq qoǵamynda birjaqty tujyrym joq.
Bir kúndik qurmettiń «qadiri» qalaı baıandy bolsyn!
Aıaýly ana men ardaqty arý kún saıyn, sát saıyn qurmetke laıyq.
Qajymuqan Ǵabdolla
Abai.kz
