Bul – teńizdiń arǵy betinde bolǵan oqıǵa. Ony jetkizgen Qulan aýylynyń turǵyny, atbegi Meıilbek Begazıev edi.
Eki qazaq jigiti sekseninshi jyldary Amerıkaǵa jumys saparymen barsa kerek. Sodan kafege toqtap tamaqtanyp, temeki tartyp turady. Kafemen irgeles bir fermerdiń at qorasy bar eken, kenet ishinen bir tulpar týlap, kisineı beredi. – Mynaǵan ne boldy? – deıdi de, olar qoraǵa jaqyndaıdy. Bular jaqyndaǵan saıyn tulpar typyrlap, bas jibin tartqylyp yntyǵa tústi. Esikke tesile qarap, qonaǵyn uzaq kútken kisishe eleńdeıdi jaryqtyq. Jigitter jaqyndap, mańdaıyna sıpap edi, momaqan bola qaldy. Sóıtip tulpar tumsyǵyn buryp, jigitterdiń qoly men jeńinen ıiskeı berdi. Iiskeı túsip, sálem berýge ıilgen kelindeı basyn tómen saldy. Osy sátte jylqynyń janarynan jas parlap ketti. Myna jaǵdaıǵa túsinbeı abdyrap qalǵan olar dereý ketpek boldy. At taǵy týlap ketti. Osy kezde fermer de kele qaldy. – Sizder munda qaıdan júrsizder? Jylqyǵa ne istep qoıdyńyzdar? – dedi de, jón surasty.
– Qazaqstannanbyz. Myna jylqy oqys qylyq kórsetip jatqan soń kórgimiz keldi. Bar-joǵy osy ǵana, – dedi jigitter.
– Túsinikti, – dedi fermer, – tulpar Lýgovoı jylqy zaýytynan satyp alynǵan. Jerlesterin tanyp turǵan ǵoı!
O, toba deseńshi, qazaqsha sózge elip, týǵan jerge degen saǵynyshyn basa almaǵan tulpardyń kúıi kúızeliske tústi. Sezimtal jaryqtyq-aı, net¬ken kıeli ediń! Muńǵa toly bir tamshy jas jigitterdiń de júregin eljiretip jiberdi.
Q.QURBAN
