Búgin Irak ókilderiniń bastamasymen Memlekettik qyzmet isteri jáne sybaılas jemqorlyqqa qarsy is-qımyl agenttiginiń Tóraǵasy Alık Shpekbaev Irak Respýblıkasynyń Qazaqstan Respýblıkasyndaǵy senimdi ókili Iýnýs Salım Sarhan Al-Shahmanmen kezdesti dep habarlaıdy Qamshy.kz aqparat agenttigi QR Memlekettik sybaılas jemqorlyqqa qarsy agenttiktiń baspasóz qyzmetine silteme jasap.
Alık Shpekbaev Agenttikpen Qazaqstan Respýblıkasy Prezıdentiniń janyndaǵy Memlekettik basqarý akademııasynyń bazasynda Irak Respýblıkasynyń memlekettik qyzmetkerlerin oqytý múmkindigi qarastyrylatynyn aıtty.
Atap aıtqanda, memlekettik basqarýdyń negizderi, sybaılas jemqorlyqqa qarsy strategııany iske asyrý, jobalardy basqarý, memlekettik basqarý júıesindegi kóshbasshylyqty, strategııalyq menedjmentti oqytý kózdelýde. «Irak áriptesterin Qazaqstanda oqytý memlekettik qyzmettiń sapasy men memlekettik qyzmetkerlerdiń biliktiligin arttyrý boıynsha qazaqstandyq tájirıbeni halyqaralyq deńgeıge kóterýge septigin tıgizedi», - dedi Agenttik Tóraǵasy.
Jalpy, senimdi ókildiń bastamasy, taraptar arasynda qol qoıýǵa josparlanǵan Memorandým aıasynda, sondaı-aq halyqaralyq baǵdarlamalar men granttar sheńberinde Agenttikpen júzege asyrylatyn bolady. Sonymen birge, Agenttik Tóraǵasy Qazaqstannyń memlekettik qyzmet, sybaılas jemqorlyqqa qarsy is-qımyl jáne memlekettik qyzmetterdi kórsetý salalaryndaǵy jetistikter týraly áńgimeledi.
Óz kezeginde Salım Iýnýs myrza Agenttik Tóraǵasymen kezdeskenine alǵysyn bildirip, eki eldiń kásibı memlekettik apparat qurýdaǵy qarym-qatynastarynyń tıimdi jáne syndarly damýyna senim bildirdi. Senimdi ókil myrza «sybaılas jemqorlyq» - ártúrli dárejede barlyq elderge áser etetin kúrdeli áleýmettik, saıası jáne ekonomıkalyq qubylys ekenin atap ótti.
Sybaılas jemqorlyq demokratııalyq ınstıtýttardy buzady, ekonomıkalyq damýdy báseńdetedi jáne memlekettik qurylymdy buzady. Osyǵan baılanysty, ol burynǵy qoǵamdyq birlik komıssııasy (CPI) dep atalatyn Iraktaǵy adaldyq komıssııasynyń qyzmeti týraly habardar etti.
«Komıssııanyń mindeti - Irak úkimetiniń barlyq deńgeılerinde jemqorlyqtyń aldyn alý jáne tergeý. Komıssııa azamattarǵa anonımdi tásildermen sybaılas jemqorlyq týraly habarlaýǵa múmkindik beretin memlekettik bilim berý jáne bilim berý baǵdarlamalary arqyly ashyq, adal jáne jaýapty úkimetti alǵa jyljytýǵa jáne kótermeleýge umtylady», - dedi Salım Iýnýs.
Kezdesý sońynda qonaq Alık Shpekbaevke kezdesý úshin alǵysyn bildirip, odan ári yntymaqtastyqqa daıyn ekenin bildirdi.
qamshy.kz
