Órkendeý jolyna túsken Qazaqstanǵa eshqashan toqmeıilsýge, toqtaýǵa bolmaıdy. QR Táýelsizdiginiń 30 jyldyǵyna arnalǵan saltanatty jıynda Elbasy Nursultan Nazarbaev osyndaı oı aıtty.
«Ǵasyrlar boıy ata-babalar ulan baıtaq jerdi aq bilektiń kúshimen, aq naızanyń ushymen qorǵap, bizge mıras etti. Men sol ata-babalar amanatyna árdaıym adal boldym. «El basyna kún týsa, er etikpen sý kesher. Arǵymaqqa kún týsa, aýyzdyqpen sý isher» degen sóz bar. Jurtymnyń bolashaǵy úshin janymdy aıamadym. Búgin arada 30 jyl ótken soń sol asqaq armandarymnyń oryndalǵanyn kórý - men úshin zor baqyt. Jetken barlyq bıikter - bizdiki jáne bárimizdiki. Ony eshkim de joqqa shyǵara almaıdy», - degen Tuńǵysh Prezıdent orda buzar jasqa kelgen Qazaqstan bolashaqta qazirgiden de qýatty, áıgili memlekettiń birine aınalatynyna senim bildirdi.
«Qazirgi kúni biz aldymyzǵa ozyq 30 eldiń qataryna qosylý jóninde erekshe maqsat qoıyp otyrmyz. «Armansyz adam – qanatsyz qus» degendeı, órkendeý jolynda bizge eshqashan toqmeıilsýge, toqtaýǵa bolmaıdy», - dedi Nursultan Nazarbaev.
Aıta keteıik, búgin Memleket basshysy Qasym-Jomart Toqaevtyń qatysýymen QR Táýelsizdiginiń 30 jyldyǵyna oraı saltanatty jıyn ótip jatyr.
Saltanatty is-sharaǵa QR Tuńǵysh Prezıdenti – Elbasy Nursultan Nazarbaev, Úkimet músheleri, Parlament depýtattary, mádenıet jáne qoǵam, óner, sport qaıratkerleri, zııaly qaýym ókilderi qatysyp otyr.
