Táýelsizdik shejiresi Elbasynyń qolymen jazyldy. Bul týraly Táýelsizdiktiń 30 jyldyǵyna arnalǵan saltanatty is-sharada QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Múldem jańa geosaıası ahýalda memleket qurý - ońaı sharýa emes, naǵyz kóshbasshynyń ǵana qolynan keletin is. Eń kúrdeli, bulyńǵyr kezeńde Nursultan Ábishuly Nazarbaevtaı dara tulǵa tarıh tórine shyqty. Anyǵyn aıtqanda, Táýelsizdik shejiresi Elbasynyń qolymen jazyldy. 1991 jyly 1 jeltoqsanda halqymyz oǵan biraýyzdan daýys berip, senim mandatyn tapsyrdy. Al 16 jeltoqsanda Prezıdent Qazaqstan Respýblıkasynyń Memlekettik táýelsizdigi týraly Konstıtýııalyq zańǵa qol qoıdy. Aqıqatyn aıtsaq, bul halqymyzdyń tarıhyndaǵy eń qýanyshty ári baqytty sát boldy», - dep atap ótti QR Prezıdenti.
Memleket basshysy sol sátten qazaq eliniń jańa dáýiri – Táýelsizdik dáýiri bastalǵanyn atap ótti. «17 jeltoqsanda Elbasy Almatydaǵy alańǵa kelip, eldiń ortasyna shyqty.
Tuńǵysh Prezıdent:
«Halqymyzdyń bıligi tolyq óz qolyna tıdi. Azat kún týdy» dep halyqtan súıinshi surady. Onyń tebireniske toly sol sózi jurttyń jadynda jattalyp qaldy. Tipti keıbir adamdar Táýelsizdiktiń qundylyǵyn jete túsinbeýi múmkin. Al aǵa býyn onyń qandaı qıyndyqpen kelgenin jaqsy biledi. Tarıhı kúnderdiń árbir mınýtyn tek Elbasy ǵana sezinip, basynan ótkergen dep aıtsaq artyq emes», - dedi Memleket basshysy.
