Sabyr Qasymov: Jeltoqsanshylarǵa «Bostandyq úshin kúresken qaharmandar» degen arnaıy mártebe berý kerek

1984
Adyrna.kz Telegram

Jeltoqsan oqıǵasyna qatysýshylarǵa «Bostandyq úshin kúresken qaharmandar» deıtin arnaıy mártebe berý kerek. Ulttyq akademııalyq kitaphanada ótken «Jeltoqsan. 1986. Dekabr. Dokýmentalnaıa hronıka» atty kitaptyń tanystyrylymy kezinde Saıası qýǵyn-súrgin qurbandaryn tolyq aqtaý jónindegi memlekettik komıssııanyń múshesi Sabyr Qasymov osyndaı usynys aıtty, dep habarlaıdy QazAqparat tilshisi.

«Jeltoqsan kezinde zardap shekkenderdiń sanyn turaqtandyrýymyz kerek. Biz qazir Saıası qýǵyn-súrgin qurbandaryn tolyq aqtaý jónindegi memlekettik komıssııanyń tarapynan osy kúnge deıin Jeltoqsan boıynsha isti bolǵan jastardyń nesheýi aqtalǵanyn suratyp jatyrmyz.

Aqtaldy degende, sottalǵandar men qamaýǵa alynǵandardy aıtyp otyrmyz. Onyń ózinde sol kezdegi mılıııanyń tizimine túskender ǵana aqtalǵan. Al qansha jastardy aldyn ala qamaý kameralaryna, arnaıy jabdyqtalmaǵan qosymsha oryndarǵa aparyp qamaı berdi?! Solardyń sanyn áli eshkim turaqtandyrǵan joq», - deıdi «Qaharmandar» respýblıkalyq qoǵamdyq qorynyń prezıdenti.

Zańger ǵalym Jeltoqsanǵa qatysqany úshin sottalǵandardyń arasynda belgili bir sebeptermen aqtalmaı qalǵandary da bar ekenin aıtady.

«Sottalǵandardyń naqty sany 103 dep júrmiz. Olardyń kóbi aqtaldy. Mılıııaǵa qarsylyq kórsetkeni úshin aqtalmaǵan Myrzaǵul Ábdiqulov sııaqty biren-sarany aqtalǵan joq. Ol da ózine shabýyl jasalǵanda pyshaqpen qorǵanǵanyn bilesizder», - dedi Sabyr Qasymov.

Memlekettik komıssııa múshesi Jeltoqsan batyrlaryna arnaıy mártebe berý ne úshin qajet ekenin de aıtty.

«Biz Jeltoqsanǵa qatysqan otandastarymyzǵa «Bostandyq úshin kúresken qaharmandar» degen mártebe berýimiz kerek. Sondaı statýs berilse, olardy aqtaý, áleýmettik jaǵynan qorǵaý, tarıhı ádildikti qalpyna keltirý sııaqty kóptegen máseleniń túıini ózdiginen sheshimin tabady. Jeltoqsan oqıǵasyna qatysqany úshin jazalaý, qýǵyndaý sharalarynan zardap shekkenderdiń de sany eseptelýi kerek. Oqıǵa eń bir shıelenisken tusta Almatydan ózge óńirlerde de jastar shyqty. Tolyq san eshkimde joq. Solardyń qanshasy aqtaldy? Almatyda 600-den astamy aqtaldy. Al oblystarda qanshasy eskerýsiz ketti. Solardyń bárin naqtylaý mindeti tur aldymyzda», - dedi ol.

 

Pikirler