Qazaqstan Respýblıkasynyń Prezıdenti Qasym-Jomart Toqaev Táýelsizdiktiń 30 jyldyǵy qarsańynda el azamattaryna alǵys aıtty, dep habarlaıdy QazAqparat.
«Barshańyzdy qasterli Táýelsizdigimizdiń 30 jyldyq mereıtoıymen shyn júrekten quttyqtaımyn. Bul – ult mereıin ósiretin ulyq meıram. Biz tarıh turǵysynan alǵanda qysqa merzim ishinde jańa Qazaqstannyń negizin qaladyq. Tuǵyry berik, ekonomıkasy qýatty, bedeli bıik memleketke aınaldyq.
Munyń bári – eń aldymen Elbasy Nursultan Ábishuly Nazarbaevtyń kóregen saıasatynyń jemisi. Sonymen birge búkil halqymyzdyń eren eńbeginiń nátıjesi», - dedi Memleket basshysy memlekettik nagradalar ıegerlerin marapattaý rásiminde.
Óz sózinde Prezıdent kez kelgen halyqtyń tabysqa jetýi azamattaryna baılanysty ekenin eske saldy. «Bul ómirdiń zańy. Adam kapıtaly men myqty memleket – barlyq qıyndyqty eńsere alady. Táýelsizdik kezeńinde halqymyz eldiktiń biregeı úlgisin kórsetti.
«Eńbek – yrystyń bulaǵy, baqyttyń shyraǵy» dep beker aıtylmaǵan. Shyn máninde, bizdiń búgingi jetistigimiz – barsha halqymyzdyń ortaq jeńisi. Jańa Qazaqstandy órkendetýge azamattarymyzdyń kóbi súbeli úles qosty. Búgingi mereıli sátte elimizdiń barsha azamattaryna tabandy eńbegi úshin zor alǵys aıtamyn», - dedi Qasym-Jomart Toqaev.
Aıta keteıik, Aqordada Memleket basshysynyń Jarlyǵymen elimizdiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi, belsendi qoǵamdyq qyzmeti úshin bir top azamat memlekettik nagradalarmen marapattaldy.
