Táýelsizdiktiń 30 jyldyǵy: Qarapaıym azamattardyń memleket damýyna qosqan úlesi zor - Máýlen Áshimbaev

840
Adyrna.kz Telegram

Senat tóraǵasy Máýlen Áshimbaev jumys saparymen Almaty oblysyna keldi. Sapar barysynda ol Táýelsizdiktiń 30 jyldyǵyna arnalǵan saltanatty is-sharaǵa qatysty, dep habarlaıdy QazAqparat.

Jetisý jurtshylyǵymen kezdesýde Senat spıkeri Qazaqstannyń táýelsiz memleket retinde qalyptasýynyń negizgi kezeńderine jáne elimizdiń 30 jylda qol jetkizgen jetistikterine toqtaldy.

Máýlen Áshimbaev osy jyldar ishinde elimiz shekarany shegendep, jańa ekonomıkalyq júıege kóship jáne ony nyǵaıtyp, memlekettik ınstıtýttardyń berik negizin qalaǵanyn aıtty.

«Elbasynyń tarıhı sheshimimen Arqa tórinde jańa elordamyzdy turǵyzdyq. Astanany salý tutas eldiń ekonomıkasyna mýltıplıkatıvti áserin tıgizdi. Qazirgi tańda Nur-Sultan qalasy barlyq sala men óńirge qan júgirtken elimizdiń naǵyz júregine aınaldy», – dedi Senat tóraǵasy.

Máýlen Áshimbaev Táýelsizdik alǵaly Almaty oblysynyń ósip-órkendegenin jáne osy kezeńde óńir turǵyndarynyń turmystyq jaǵdaıy artqanyn tilge tıek etti. Aımaqta iri kásioryndar boı kóterip, myńdaǵan jumys orny ashylǵanyna nazar aýdardy. Sondaı-aq Senat tóraǵasy Prezıdent Qasym-Jomart Toqaevtyń elimizdi jańǵyrtý baǵdary Qazaqstannyń damýyna tyń serpin bergenin jáne sonyń aıasynda saıası, áleýmettik reformalardy iske asyrýǵa jol ashylǵanyn jetkizdi.

«Saıası básekeniń nyǵaıýyna yqpal etken mańyzdy sheshimder qabyldandy. Áleýmettik salany damytýǵa aıtarlyqtaı nazar aýdaryldy. Muǵalimderdiń, medıına, mádenıet qyzmetkerleriniń jalaqysy edáýir ulǵaıdy. Ustazdardyń mártebesi ósti. Múgedekterdi qoldaý baǵytyndaǵy zańnamalyq baza nyǵaıa tústi. Ekonomıkany ártaraptandyrý isi jańa qarqynmen jalǵasyn tapty», – dedi Máýlen Áshimbaev.

Saltanatty is-shara barysynda Almaty oblysynyń ákimi Qanat Bozymbaev ta sóz sóılep, Táýelsizdik kúni memlekettilik pen halyq birliginiń jarqyn kórinisi ekenin aıtty.

«Osy jyldar ishinde zor múmkindikterge jol ashyldy, aýqymdy bastamalar iske asyryldy. Elbasynyń salıqaly saıasatymen iske asyrylǵan ulan-ǵaıyr isterdi qazir Prezıdentimiz Qasym-Jomart Toqaev jalǵastyryp keledi. Tarıhqa taǵzym etý, tulǵalardy taný, eldikti qurmetteý, táýelsizdikti odan ári nyǵaıtý – bárimizge artylǵan úlken mindet, búgingi urpaqtyń perzenttik paryzy. Bul rette qarapaıym azamattardyń memleket damýyna qosqan úlesi zor. Olar eldiń erteńine sendi, kúndiz-túni tynymsyz eńbek etti, tabandylyq tanytty. Sonyń bári Táýelsizdigimizdi nyǵaıtýǵa óz septigin tıgizdi», – dedi Qanat Bozymbaev.

Sonymen qatar Senat tóraǵasy men oblys ákimi Jetisý jurtshylyǵyn Táýelsizdiktiń 30 jyldyǵymen quttyqtap, Prezıdent atynan elimiz ben osy óńirdiń damýyna úlken úles qosqan azamattarǵa memlekettik nagradalardy tapsyrdy. Máýlen Áshimbaev oblysqa sapary aıasynda «Taldyqorǵan» júzý basseınine jáne I.Jansúgirov atyndaǵy Jetisý ýnıversıtetiniń Stýdentter úıine arnaıy atbasyn burdy. Odan bólek, jergilikti Táýelsizdik qurdastarymen kezdesip, egemendiktiń 30 jylynda atqarylǵan jumystyń bári, eń aldymen, óskeleń urpaqty qoldaýǵa baǵyttalǵanyn aıtty.

Táýelsizdikti kózimizdiń qarashyǵyndaı qorǵaý, ony qadirleý jáne nyǵaıtý barsha qazaqstandyqtyń eń basty mindeti ekenin, bul rette, ásirese, jastarǵa úlken jaýapkershilik júkteletinin de tilge tıek etti. «Búgin sizder 2050 jyldyń jastary úshin hat ázirlep otyrsyzdar.

Elimiz osy ǵasyrdyń ortasyna qaraı álemniń eń damyǵan 30 eliniń qataryna qosylýdy maqsat etip qoıdy. Bul hatty sol úlken eldik maqsatymyz oryndalǵan qoǵamnyń jastary oqıdy dep senemiz. Al búgingi jas býyn sol jarqyn qoǵamdy qalyptastyrý úshin aıanbaı eńbek etýi kerek. Jastarymyz bul mindetti abyroımen atqarady dep senemiz», – dedi Máýlen Áshimbaev.

 

Pikirler