Qazaqstannyń Tuńǵysh Prezıdenti – Elbasy Nursultan Nazarbaev Táýelsizdiktiń 30 jyldyǵyna arnalǵan saltanatty jıynǵa qatysyp, qazaqstandyqtardy ulyq merekemen quttyqtady.
Nursultan Ábishuly óz sózinde Qazaqstannyń osy jyldar ishinde qol jetkizgen basty jetistikterin atap ótip, táýelsiz memleket qurý jáne ony damytý isine qoldaý kórsetkeni úshin Qazaqstan halqyna rızashylyq bildirdi.
Elbasynyń quttyqtaý sóziniń tolyq mátinin nazarlaryńyzǵa usynamyz.
Qymbatty otandastar!
Ardaqty aǵaıyn!
Qadirli halqym!
Eń asyl qundylyǵymyz – qasterli Táýelsizdiktiń 30 jyldyq torqaly toıymen barshańyzdy shyn júrekten quttyqtaımyn!
Qurmetti Qasym-Jomart Kemeluly, Sizge mazmundy baıandamańyz ben meniń el basqarǵan kezdegi eńbegime bergen asa joǵary baǵańyz úshin zor rızashylyq bildiremin.
* * *
Tuńǵysh Prezıdent retinde kún-tún demeı eldiń taǵdyr-talaıyn oılap, týǵan halqymmen birge tynymsyz ter tókken, tolassyz ýaıym keshken kezderdiń ár sáti meniń jadymda óshpesteı jazýly.
«Aq túıeniń qarny jarylǵan» aqjoltaı kún, azattyq alǵan shaǵymyz dál keshegideı kóz aldymda.
Egemen elimizdiń derbes dáýiri, saltanatty sapary sol tarıhı oqıǵadan bastalǵan edi.
Babalarymyz ǵasyrlar boıy ańsaǵan arman aqıqatqa aınaldy.
Táńirge táýbe, kózdegenimiz ben kóksegenimizge jettik!
Kókten tilegenimiz ben kópten kútkenimiz boldy.
Ketken esemizdiń, shekken zardabymyz ben kemshin-kemisimizdiń orny toldy.
Árýaq qoldady, ádilet ornady:
«Myń ólip, myń tirilgen» qasıetti halqymyz qaıta túledi.
Myńjyldyqtar toǵysar tusta baıyrǵy memlekettigimiz qaıta jańǵyrdy.
* * *
Otyz jylda elimiz tutas ǵasyrǵa tatıtyn uly joldan ótti.
Osy tarıhı kezeńde biz baǵyndyrǵan belester – Táýelsizdik dáýiriniń bir-bir bederli bıigi deýge laıyq.
Barlyǵyn túıindeı kelgende, eń basty jetistigimiz – biz Qazaqstandy álem moıyndaǵan memleket retinde qalyptastyryp, eńseli elge aınaldyrdyq.
Búginde jahan jurtshylyǵy Qazaq jerin – beıbit meken, Qazaq elin – mártebeli memleket, senimdi seriktes retinde tanıdy.
Mundaı bedelge tek rýhy kúshti, judyryqtaı jumylǵan birligi bekem halyq qana ıe bola alady.
Bir úıdiń balasyndaı, bir qoldyń salasyndaı yntymaǵy jarasqan jurtymyzdyń úlken-kishisine sol úshin shynaıy alǵysymdy arnaǵym keledi.
Osy oraıly sátte, azattyq alýdyń aýyr júgin birge kóterisken aldyńǵy-keıingi serikterime de arnaıy rahmet aıtamyn.
* * *
Taıaýda «Táýelsizdik taǵylymy» atty maqalam jaryq kórgenin bilesizder.
Ondaǵy elim dep emirenýden, Táýelsizdik dep tebirenýden týǵan ózekjardy oılarym men tarıhı oqıǵalardy qaıtalaýdyń qajeti joq shyǵar.
Tek almaǵaıyp zamanda azýly men tistiniń, kúshti menen sustynyń oljasy bolyp ketýden ońaı nárse joq ekenin ǵana eske salyp ótkim keledi.
Sondyqtan jahandaný jalynyna jutylyp ketpeı, ulttyq jańǵyrýdyń negizin birlese nyqtaýymyz qajet.
* * *
Osydan otyz jyl buryn Tuńǵysh Prezıdent retinde qyzmetime kiriser aldyndaǵy saltanatta maǵan halqymyzdyń abyz aqsaqaly Shákir Ábenov dana babalar dástúrimen:
Tar asý, taıǵanaq jol, ker beleste,
El tizginin nyq ustar sen emes pe?!
Halqyń súıgen perzenti bol deıtuǵyn,
Qart atań toqsan birde men emes pe?!
– dep aq batasyn bergen bolatyn.
Bataǵa qosa halyqtyń keleshekke degen úmiti men arman-tilegin jetkizip, amanat júktegeni áli esimde.
Ózim basshylyq etken otyz jylǵa jýyq ýaqyt boıy men halqymnyń seniminen shyǵýǵa bar kúsh-jigerimdi jumsap, sanaly ǵumyrymdy el ıgiligi úshin aıanbaı qyzmet etýge arnadym.
Eńbegim aqtaldy dep oılaımyn.
Otanymyz Qazaqstan Respýblıkasy Ortalyq Azııanyń kóshin bastap, TMD elderiniń tórine jaıǵasty.
Alpaýyt eldermen úzeńgi qaǵystyryp, ozyq memlekettermen teń dárejede yntymaqtastyq ornatty.
* * *
Jyr alyby atanǵan babamyz Jambyl Jabaev kezinde: «Jambyl – meniń jaı atym, halyq – meniń shyn atym», – depti ǵoı.
Búginde eńbegimdi elegen el-jurtym meni óziniń atyna ortaqtastyryp, «Elbasy» degen mártebe berdi.
Óz basym «El maǵan emes, kerisinshe men elime ne beremin?» deýmen kele jatqan adammyn.
Budan da keıin, aqyrǵy demime deıin týǵan elimniń tynys-tirshiligine alańdaýmen óterim anyq.
* * *
Eń qıyn da kúrdeli sheshimder qabyldar sátterde men árdaıym qalyń elime, qara orman halqyma arqa súıedim.
Maǵan árdaıym senim artyp, barlyq bastamalaryma qoldaý kórsettińizder.
Sol úshin barshańyzǵa taǵy da rahmet!
* * *
Biz – tekti halyqtyń urpaǵymyz.
Ǵasyrlar boıy batyr babalar ulan baıtaq jerdi aq bilektiń kúshimen, aq naızanyń ushymen qorǵap, bizge mıras etti.
Men sol ata-babalar amanatyna árdaıym adal boldym.
«El basyna kún týsa, er etikpen sý kesher» degendeı, jurtymnyń jarqyn bolashaǵy úshin janymdy aıamadym.
Búgin, arada 30 jyl ótken soń, sol asqaq armandarymnyń oryndalǵanyn kórý – men úshin zor baqyt.
Jetken barlyq bıikter – bizdiki jáne bárimizdiki.
Ony eshkim de joqqa shyǵara almaıdy.
Men orda buzar jasqa endi tolǵan Qazaqstannyń bolashaqta qazirgiden de qýatty, álemge áıgili memlekettiń biri jáne biregeıine aınalǵanyn qalaımyn ári soǵan senemin.
* * *
Qazirgi kúni biz aldymyzǵa ozyq 30 el qataryna qosylý jóninde órshil maqsat qoıyp otyrmyz.
«Armansyz adam – qanatsyz qus» degendeı, elimizdi órkendetý jolynda bizge eshqashan toqmeıilsýge, toqtap qalýǵa bolmaıdy.
Jer kólemi jóninen álemde 9-shy oryn alatyn elimiz basqa da barlyq baǵyt boıynsha bolashaqta ozyq 10 memleket qataryna qosylsa dep armandaımyn.
Uly murat jolyna belin baılaǵan ultymyz, maqsatker de jasampaz jurtymyz barda sol armanymnyń oryndalaryna sengim keledi.
Ardaqty áleýmet!
Bardy baǵalaǵan – ozady, joqty qýalaǵan – tozady.
Táýelsizdikten qymbat qundylyq, egemendikten asqan baılyq joq.
Biz basymyzǵa baq bolyp qonǵan azattyqty aıalaı bilýimiz kerek.
«Tirlik basqa bolsa da – tilek bir, Barmaq basqa bolsa da – bilek bir» degen atadan qalǵan ulaǵatty sóz bar.
Táýelsizdikti jarııalap, turlaýly etý bizdiń býynǵa buıyrǵan baqyt ári kıeli borysh boldy.
Al sol Táýelsizdikti qorǵaý men el yrysyn eseleý – keler urpaqqa, jastarymyzǵa asyl paryz ári amanat.
Zamanaýı bilimmen qarýlanǵan búgingi jas tolqyn Táýelsizdiktiń jańa jylnamasyn jazyp jatyr.
Qazirgideı aýmaly-tókpeli ýaqytta bárin tek bilim, ǵylym, taýdaı talap pen tabandy izdenis arqyly ǵana tolyq ıgerip, bekem baǵyndyrýǵa bolady.
Osy oraıda, men táýelsizdik urpaqtaryna – jastarǵa zor úmit artamyn jáne aq batamdy beremin.
Qurmetti qazaqstandyqtar!
Bizge aldaǵy ýaqytta beıbitshilikti jaqtaıtyn saıasatymyz ben halyqtyń ál-aýqatyn jaqsartý baǵytyndaǵy ıgi áreketterimizdi jalǵastyra berý kerek.
Kópshilik halyqtyń qoldaýymen resmı joǵary bılik tizginin qolyna alǵan Memleket basshysy Qasym-Jomart Kemeluly Toqaev búginde strategııalyq baǵdarymyzdy laıyqty jalǵastyryp, eldi tıimdi basqaryp keledi.
Eli erine sengen, eri eline súıengen joraly jurtymyzdyń erteńi budan da jarqyn bolaryna kúmánim joq.
* * *
Yntymaq pen birlikti tý etken el kez kelgen tar jol, taıǵaq keshýden súrinbeı ótetini anyq.
Ony otyz jylda ózgege de, ózimizge de daýsyz dáleldedik.
Endeshe, eldiktiń altyn arqaýyndaı ulttyq aýyzbirligimizdi ardaqtap, Táýelsizdikti kózdiń qarashyǵyndaı saqtaýymyz kerek.
Sondyqtan árdaıym tuǵyrymyz – tynyshtyq, tilegimiz tatýlyq bolýǵa tıis.
Qymbatty otandastar!
Táýelsizdiktiń 30 jyldyǵy – jasampaz Qazaqstan tarıhynyń jańa bir belesi.
Elimiz máńgilikke baǵyt ustaǵan uzaq joldyń áli de basynda dep sanaımyn.
Ult bolyp attanǵan sol uly joldaǵy alysty kózdegen saparymyz sátti bolsyn!
Barshamyzdy babalar arýaǵy qoldap, halqymyzdy beıbitshilik pen berekeden aıyrmasyn.
HHI ǵasyr Qazaqstannyń «altyn ǵasyryna» aınalsyn.
Táý eter kıemiz – Táýelsizdik jasasyn!
Egemendigimiz baıandy, eldigimiz máńgi bolsyn!
“Adyrna” ulttyq portaly
