Shymkent qalasynyń ákimi Murat Áıtenovtiń tapsyrmasyna sáıkes, áýejaıdyń jańa jolaýshylar termınalynyń qurylys jumystary júrgizilýde.
Búgingi tańda jobanyń birinshi kezeńi tolyǵymen 100 paıyzǵa oryndaldy. Al jobanyń ekinshi kezeńi boıynsha qurylys jumystary qarqyn alǵan. Qasbettik júıelerdi montajdaý jumystary aıaqtaldy. Qazirgi tańda, jolaýshylar termınaly qurylysynyń 80 % jumystary oryndaldy.
Shymkent qalasy ákiminiń orynbasary Maqsut Isahov áýejaıdyń jańa jolaýshylar termınalynyń qurylys jumystarymen tanysty. Odan bólek Maqsut Pernebaıuly áýejaı aýmaǵyn abattandyrýǵa arnalǵan jobalardyń júzege asyrylý barysyn aralap kórdi.
Ótken jyly qala ákimdigimen 912 mln teńgege áýejaı aldyndaǵy alańdaǵy avtoturaqty abattandyrý boıynsha jumystar júrgizilip, aıaqtalǵan bolatyn. Al jobalyq quny 1,7 mlrd teńge quraıtyn jańa kirme joldy salý boıynsha jumystar da aıaqtalyp otyr.
Shymkent qalasy ákimdiginiń baspasóz qyzmeti
