Shymkenttegi Y.Altynsarın atyndaǵy №65 mektep-gımnazııa oqýshylary QR Sýretshiler Odaǵynyń múshesi Serikbaı Jorabekovpen kezdesti.
Táýelsizdiktiń 30 jyldyǵy qarsańynda uıymdastyrylǵan kezdesýde, sýretshiniń ónerimen tanysqan oqýshylar men ustazdar kókeılerinde júrgen suraqtaryn qoıyp, pikir bólisti.
Talant týyla bitkenmen, onyń tolysyp, ósip-órkendeýi adam júreginde jatqan bir sıqyr. Ony jaryqqa shyǵaratyn qudiret ol – óner. Serikbaı Qulyshuly birneshe jyldyq eńbek jolyndaǵy qundy týyndylaryn ózimen birge ala kelgen. Ár shyǵarmasynda úlken mán bar. Eńbekteri jan-jaqty janrdy qamtyǵan. Ár shyǵarmasy tarıhpen baılanysqan, shynaıy kórkemdigimen kóz tartady.
Serikbaı Qulyshuly mektep oqýshylaryna sheberlik sabaǵyn ótkizdi. Tamasha týyndy beıneleýdiń qyr-syryn, sýretshige tán qasıetterdi, qarapaıym qaryndashty ustaýdyń ózindik ádisin, sý boıaýynyń maǵynaly sýret shyǵarýdaǵy ornyn túsindirdi. Natıýrmort salyp, jeke tájirıbesimen bólisti.
