Ertis-Baıan óńirin eki kún boıy jyrǵa bólegen oblystyq alaman aıtys máresine jetti. Bul aımaqta mundaı erekshe aıtys buryn-sońdy bolmaǵan edi. Ereksheligi sol, jyr dodasynda oblystyń úlken-kishi barlyq derlik aqyny qatysty. El Táýelsizdiginiń 30 jyldyǵyna arnalǵan aıtys alamanyna otyzǵa jýyq aqyn tústi. Olardyń eń jasy 18-de bolsa, eń úlkeni 73 jastaǵy ardager aıtyskerler.Taǵy bir ereksheligi – qomaqty júlde qorynda.
Aǵymdaǵy aıdyń 3-4 kúnderi Pavlodar oblysynyń ákimdigi, oblystyq mádenıet, tilderdi damytý jáne arhıv isi basqarmasy, «Shańyraq» halyq shyǵarmashylyǵy ortalyǵynyń uıymdastyrýymen «Táýelsizdikke taǵzym» atty aqyndar aıtysy ótti. Aımaqtyń ár qala, aýdanynan kelgen 28 aqyn qatysty. Olarǵa arnaıy shaqyrylǵan qurmetti meımandar, halyqaralyq «Alash» ádebı syılyǵynyń laýreaty, «Qurmet» ordeniniń, «Eren eńbegi úshin» medaliniń ıegeri Ǵalym Jaılybaı, L.N.Gýmılev atyndaǵy ENÝ-dyń professory, talaı respýblıkalyq, halyqaralyq aıtystardyń jeńimpazy Amanjol Áltaev bastaǵan qazylar tórelik etti.
- Aty oblystyq bolǵanymen, deńgeıi respýblıkalyq, halyqaralyq aıtysqa teń boldy. Jergilikti jurtshylyqtyń aıtysqa sýsyndap qalǵanyn da kórip otyrmyz. Talaı tektilerdiń kindigin kesken, besigin terbetken kıeli mekenniń kórermenderiniń yqylasyna, adal kóńiline de rıza boldym. Aqyndardyń deńgeıi de óte joǵary. Qaı-qaısysy bolsa da úlken alamanǵa shyǵarýǵa laıyqty, - dedi qazylar alqasynyń tóraǵasy Ǵalym Jaılybaı.
Álemdi jaılaǵan pandemııaǵa baılanysty ádebıetimizdiń aqberen janry, bekzat ónerimiz aıtystan da biraz ýaqyt qol úzip qalǵanymyz belgili. Rasymen, eki kún boıy aıtys ótken qarashańyraq, J.Aımaýytov atyndaǵy oblystyq qazaq teatrynyń kórermender otyratyn zalynyń toly bolǵanyn, jurtshylyqtyń saǵattap tapjylmaı, aqyndarǵa shabyt berip otyrǵanyn kóz kórdi. Aqyndar da aıanyp qalmady.
«Altyn dombyra» ıegeri Aspanbek Shuǵataev, elimizge belgili aıtyskerler Raýan Qaıdarov, Qýanyshbek Sharmanovtar jasyndaı jarqyldady. Otty jyrymen kórermenniń erekshe yqylasyna bólengen Abzal Qabdrash, qobyzdyń sarynymen birde kúńirentip, birde jadyratqan Bóken Jiger, túıdek-túıdek oılarymen, tereń tolǵaýlarymen Mızan Jumali, Qaırolla Hafız, Orazbek Saıahat sııaqty jastar aıtystyń jańalyǵy boldy. Bul rette, aımaqta aıtys óneriniń órkendeýine ólsheýsiz úles qosyp, talaı aqyndy baptap shyǵarǵan belgili aqyn, «Jeldirme» aqyndar mektebiniń jetekshisi Asyǵat Turǵanbektiń eńbegi orasan. Muny oblys ákimi Ábilqaıyr Sqaqov ta erekshe atap ótti.
- Táýelsizdiktiń torqaly toıyna oraı alaman aıtystyń ótýi ıgi dástúr dep bilemin. El egemendik alǵan 30 jyldyń ishinde óńirimizde aıtys aqyndarynyń úlken shoǵyry qalyptasty. Bul rette, jergilikti «Jeldirme» aqyndar mektebiniń úlesi zor. Eldiń sózin sóıleý, kúrmeýli máselelerdi óner tilimen jetkizý jaýapkershiligi zor is. Aqyndarymyz abyroı bıiginen túspesin. Táýelsizdigimiz tuǵyrly bolsyn, - dedi aımaq basshysy.
Qazylar alqasynyń sheshimimen oblystyq alaman aıtystyń Bas júldesi jáne 2 mln teńge syıaqy Aspanbek Shuǵataevqa buıyrdy. Birinshi orynǵa taǵaıyndalǵan 1 mln teńge jas talant Abzal Qabdrashtyń enshisinde. Eki II-shi oryndy Qýanyshbek Sharmanov pen Raýan qaıdarov úlestirip aldy. Olardyń árqaısysyna 700 myń teńgeniń sertıfıkattary tabys etildi. Al eki III-shi orynǵa Mızan Jumali men Bóken Jiger turaqtady. Jas aqyndar 500 myń teńgelik júldeni ıelendi.
Budan bólek birneshe aqynǵa 150 myń teńge arnaıy júlde, árbir qatysqan aqynǵa 100 myń teńgeden úlestirildi. Budan bólek, kórermender arasynan kásipker, meenat Asylbek Týǵanbaı eki aqyn, Orazhbek Saıahat pen Aıbek Oralhanǵa arnaıy qarjylaı júlde tabystady.
Alaman jyr dodasy aıasynda aımaqtyń aıtys óneriniń ardagerleri Beısenbi Muqajan, Jumken Seıitov, Sholpan Baıǵaly, Qanat Shaıǵazın, Baltabaı Syzdyqov oblystyq mádenıet basqarmasynyń alǵash taǵaıyndaǵan «Rýhanııat» medalimen marapattaldy.
“Adyrna” ulttyq portaly
