Qazaqstan Ulttyq Banki Qazaqstan Respýblıkasy Táýelsizdiginiń 30 jyldyǵyna arnalǵan nomınaly 20 000 teńgelik mereıtoılyq banknotty aınalysqa shyǵarady. Bul týraly Ulttyq banktiń baspasóz qyzmeti jazdy, dep habarlaıdy «Adyrna» tilshisi.
Mereıtoılyq banknottyń dızaıny biregeı tehnologııa boıynsha daıyndaldy: banknottyń tiginen ornalasqan jáne nomınaldyń golografıkalyq beınesin, Táýelsizdiktiń 30 jyldyǵyna arnalǵan logotıpti jáne Memleket basshysy Q.K. Toqaevtyń faksımılesin qamtyǵan metalsyzdandyrylǵan jolaq álemde alǵash ret qoldanyldy.
Mereıtoılyq banknottyń 27 qorǵanysh elementi bar. Banknottyń dızaıny aınalystaǵy aqsha belgilerimen biryńǵaı stılde jasalǵan: bet jaǵy negizinen tik beınelerdi, syrtqy jaǵy kóldeneń beınelerdi qamtıdy. Banknot basym tús – sur túste oryndalǵan. Banknot kólemi 155h79mm.
Banknottyń bet jaǵy
Bet jaǵyndaǵy negizgi beıneler – Qazaqstan Respýblıkasynyń Memlekettik rámizderi, Qazaqstan Respýblıkasynyń Tuńǵysh Prezıdenti – Elbasy N.Á. Nazarbaev portretiniń golografııalyq beınesi, Qazaqstannyń táýelsizdigi men memlekettiliginiń nyshany retinde «Qazaq Eli» monýmenti, «Máńgilik El» saltanat qaqpasy, qazaqtardyń dástúrli turǵyn úıi «Kıiz úıdi» bezendirý jelisi boıynsha «Basqur» – taspasyndaǵy qazaqtyń ulttyq órneginiń fragmenti.
Banknottyń syrtqy jaǵy
Syrtqy betindegi negizgi beıneler – Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń portreti, Nur-Sultan qalasynyń jáne Aqorda Prezıdent rezıdenııasynyń panoramalyq kórinisi, Qazaqstan Respýblıkasy Táýelsizdiginiń 30 jyldyǵyn merekeýge arnalǵan logotıp beınesi.
Nomınaly 20 000 teńgelik mereıtoılyq banknot Qazaqstan Respýblıkasynyń búkil aýmaǵynda tólemderdiń barlyq túri boıynsha naqty quny boıynsha qabyldaýǵa, sondaı-aq Qazaqstan Respýblıkasynyń barlyq bankterinde banktik shottarda aýdarýǵa, usaqtaýǵa jáne aıyrbastaýǵa mindetti.
Elbasynyń portreti bar nomınaly 10 000 teńgelik alǵashqy mereıtoılyq banknot 2016 jyly shyǵarylǵanyn jáne Qazaqstan Respýblıkasy Táýelsizdiginiń 25 jyldyǵyna oraılastyrylǵanyn eske salamyz.
Qazirgi kezde Qazaqstanda nomınaly 200, 500, 1 000, 2 000, 5 000, 10 000 jáne 20 000 teńgelik banknottar aınalysta qoldanylyp júr.
«Adyrna» ulttyq portaly
