Búginde jaryqsyz bir kúnińdi ótkizý múmkin emes. Sebebi úıde de, jumysta da barlyq qyzmet elektr qýatynyń kúshimen iske asady. Al onyń qanshalyqty qaýipti ekendigine qaramastan, kún saıyn jeke basy men densaýlyǵyn qaterge tigetin Baqtııar Berdıevtiń eńbegine turǵyndar dán rıza.
— Men otbasynda kóp balanyń biri bolyp óstim. Ata-anam qarapaıym eńbek adamdary boldy. Sol sebepti eńbekke erte aralastym. Mektepti bitirgennen keıin birneshe jyl ákemniń qasynda júrip, jumys jasadym. Keıin Nókis qalasyndaǵy polıtehnıkalyq ýchılıege túsip elektrık mamandyǵyn támamdadym. Ony aıaqtaǵan soń sol qaladaǵy motor shyǵaratyn zaýytta tórt jyl elektromonter bolyp jumys istedim. Arada birneshe jyl ótken soń Aqtóbe qalasyna kóship keldim. Qazir qala irgesindegi Prıdorojnyı baý-baqsha ujymyndaǵy elektr júıelerin qaraımyn. Buryn aýdanymyzdaǵy elektr qýatynyń kúshi az, álsiz boldy. Sol sebepti keıde jaryq sónip qalatyn. Alaıda turǵyndardyń birigip qoldaý kórsetýimen eski transformatorlardy jańalap, elektr jelilerin jóndedik. Qazir osy ujymda elektrıkpin. Elektr jelilerin qadaǵalaımyn, turǵyn úılerdiń únemi jaryqpen qamtylýyn baqylaımyn, — deıdi Baqtııar Dáýletbaıuly.
Óz isine asa jaýapkershilikpen qaraıtyn Baqtııar Berdıev on jyldan beri «Energosıstema» JShS-ynda jaryqtandyrý salasy boıynsha elektrık bolyp jumys isteıdi. Ózi turatyn aýdannyń jaryqpen qamtamasyz etilýin qadaǵalaıtyn onyń qaramaǵynda 80-ge jýyq abonent bar.
— Elektrık mamandyǵynyń sala-bólimderi ár túrli. Men jaryqty jeke úıler men páterlerge baryp qospaımyn. Tek qajetti aımaqqa deıin jetkizip beremin. Jumysymnyń kóbi dalada ótedi. Sondyqtan aýa raıynyń kúrt ózgerýi keıde jumysymyzda kóp qıyndyq týǵyzady. Jazdyń jeldi kúnderi men qystyń qarly borandary jelilerdi úzip, baǵanalardy qulatyp ketedi. Keı jaǵdaıda tal-terekter de elektr jelileriniń úzilýine sebep bolady. Osyndaı jaǵdaılarda tok júıelerinen turǵyndardyń zardap shekpeýin qatań baqylaýda ustaımyz. Sondaı-aq, jelilerdi jalǵap, tekserý barysynda ony jan-jaqty qarap, zerttep almaı iske kirispeımiz. Óıtkeni, joǵary kerneýli tokpen jumys jasaý ońaı sharýa emes. Tok kózge kórinbeıdi, onyń bar-joǵyn ańǵarmaı qalsań, qaterge urynasyń. Bul úlken yjdaǵattylyqty, biliktilikti qajet etedi. Sondyqtan kez kelgen ýaqytta qaýipsizdik erejeleriniń saqtalǵandyǵyn durys kóremin, — deıdi ol.
Energetıka salasynda biraz jyl eńbek etken keıipkerimizdiń osyndaı kásiptik sheberlikke jetýi onyń óz isine degen súıispenshiliginen bolsa kerek, ol: «Eger ekinshi márte mamandyq tańdaý múmkindigi berilse, oılanbastan taǵy da jaryqtandyrýshy bolar edim», — deıdi.
— Sebebi adal qyzmet jaryq tutynýshylar aldyndaǵy jaýapkershilik mindetimdi arttyrsa, sol eńbektiń tátti jemisi kóńilimdi marqaıtady, bıik maqsattarǵa jeteleıdi. Árqashan eńbegim elenip, shynaıy yqylasym baǵalanyp jatady. Sondyqtan men óz jumysymdy aldymen súıispenshilikpen jáne jaýapkershilikpen atqarýǵa tyrysamyn, — deıdi keıipkerimiz.
«Erinbeı eńbek etken adam ǵana bıikti baǵyndyrady» dep esepteıtin Baqtııar Dáýletbaıuly qazir jastar mamandyq tańdaýda óz qabiletterine emes, qarajattaryna kóp senetinin aıtady. Onyń aıtýynsha, sońǵy kezderi «zamanyń túlki bolsa, tazy bop shal» demekshi, jastardyń kóbi jumysy jeńil, eńbekaqysy joǵary, jaıly da záýlim ǵımarat ne keńse ishinde otyryp jumys jasaǵandy qup kóredi.
— Búgingi kúnniń ata-anasy bar jıǵan-tergenin aýyzdarynan jyryp, balalaryn oqytýǵa jumsaıdy. Al jastardyń kóp bóligi ekonomıst, zańger bolýdy qalaıdy. Alaıda keıin óz mamandyqtary boıynsha turaqty jumys taba almaı, ár jerde jeńil jumys jasap, kún kóredi. Sondyqtan ásirese, er balalar tehnıkalyq mamandyqtardy ıgerip, óz betimen jańa tehnologııalardy úırenip, jańashyldyqqa boı usynǵandary jón dep oılaımyn. Ár adam óz qarym-qabileti men múmkindigine qaraı oqyp, eńbek etse, soǵurlym jaqsy nátıjeler men jeńiske qol jetkizedi, — deıdi ol.
Óz isine shyn berilgen mamannyń eńbeksúıgishtigin joǵary baǵalaıtyn Prıdorojnyı baý-baqsha ujymynyń turǵyndary ony: «Sheber bolsa, Baqtııardaı bolsyn!» dep maqtap otyrady. Aqtóbe óńiri energetıkasynyń damýy men qala kósheleriniń jaryqtanýyna erekshe úlesin qosyp, olardy jetildirý jáne jańǵyrtý sharalaryna bar ynta-yqylasymen atsalysyp júrgen onyń alǵa qoıǵan maqsattary men josparlary kóp.
— Aldaǵy ýaqytta ózim turatyn aýdannyń kóshelerin jaryqtandyryp, sondaı-aq, turǵyndardyń qaýipsizdigin qamtamasyz etý úshin beınekameralar ornatsam deımin. Ázirge bizdiń baý-baqsha ujymyndaǵy kóshelerge resmı statýs berilgen joq. Sondyqtan memleket tarapynan eshqandaı kómek bolmaı tur. Degenmen keleshekte joldar jańaryp, turǵyndardyń jaǵdaıy jaqsarady dep senemin, — deıdi B. Berdıev.
Danagúl BAIMUQASh,
«Adyrna» ulttyq portaly.
