Qazaq taǵamtaný akademııasynyń prezıdenti, medıına ǵylymdarynyń doktory Tóregeldi Sharmanov óziniń feısbýk paraqshasynda artyq salmaq pen durys tamaqtanýǵa qatysty pikir bildirdi dep habarlaıdy "Adyrna" ulttyq portaly.
Ǵalym: "Bizde semiz kisiler kóbeıip barady. Semirýdiń negizinde energetıkalyq dısbalans jatyr. Jaqsy tamaqtanýdy kóp tamaqtanýmen shatastyrmaý kerek. "Jaqsy tamaq qalǵansha jaman qaryn jarylsyn" degendeı mátelder joqshylyq kezde shyqqan. Artyq salmaqtyń aýrý ekenin bárimiz birdeı túsine qoıǵan joqpyz. Qaryn uzarǵan saıyn ómir qysqara beredi dep kesip aıtpaımyn. Árkimniń dene turqyna qaraı árqıly et bite beredi, áıtse de semirýden saqtaný kerek. Muny adamdar erteden-aq bilgen. Mysaly, Spartada jas jigitter semire bastasa qaladan qýylatyn bolǵan", — dep jazdy.
Aıta ketý kerek, 91 jastaǵy akademık óziniń paraqshasynda oqyrmandar úshin únemi paıdaly málimetter jazyp, keńester aıtyp otyrady.
"Adyrna" ulttyq portaly.
