Almaty qalasy ákiminiń orynbasary Serik Qusaıynov qoǵamdyq kólikte jolaqy qymbattaýy múmkin ekenin málimdedi, dep habarlaıdy «Adyrna» tilshisi.
«Erteń-aq tarıfti kóteremiz dep otyrǵan joqpyz. Biz jalpy bar máseleni talqylaýdamyz. Tarıfti kóterý qajet. Eger biz bul máseleni qarastyratyn bolsaq, onda jurtshylyqpen, qala turǵyndarymen aqyldasatyn bolamyz. Bul suraq óte ózekti. Tasymaldaýshylar tarıfterdi qashan kóteretinimiz týraly jıi suraıdy. Osy máseleni kóktemde talqylaımyz dep oılaımyn»,– dedi ol.
Ákim orynbasarynyń aıtýynsha, bıýdjet jylyna 40 mıllıard teńgege jýyq sýbsıdııa tóleıdi. Bul el boıynsha eń úlken kórsetkish.
Eske sala keteıik, bir jyl buryn dotaııasyz bir jol júrýdiń naqty quny 250 teńgeni quraıtyny aıtylǵan bolatyn.
«Adyrna» ulttyq portaly
