Shymkentte sporttyq úıirmelerdi jan basyna qarjylandyrý jobasy sátti júrip jatyr. Búginde Artsportedu.kz saıty arqyly ótinim bergen kásipkerler sany 25-ke jetken. Bul týraly Shymkent qalasy ákiminiń orynbasary Maqsut Isahov BAQ ókilderimen ótken press-týrda málimdedi.
– Shymkent qalasynyń dene shynyqtyrý jáne sport basqarmasy memlekettik sporttyq jáne shyǵarmashylyq tapsyrysqa bólingen qarjy artsport.edu.kz aqparattyq portalyna engizilip, qala kásipkerlerimen memlekettik tapsyrys boıynsha jumys júrgizýde. Qazirgi tańda memlekettik sporttyq tapsyrysty jan basyna normatıvtik qarjylandyrý platformasyna 25 kásipkerden ótinim túsip, onyń ishinde 20 kásipker biliktilik irikteýinen ótip, oń sheshim berildi, 1 ásipkerdiń ótinimi qaralýda, 4 kásipkerdiń ótinimi keri qaıtaryldy (1 Túrkistan oblysyna qarasty). Ata-analardan jalpy sany 3347 ótinim túsip, onyń 2955-symen kelisim-shart jasaldy. Bul kórsetkish kún saıyn ózgerýde, - dedi M. Isahov
Qala ákiminiń orynbasary bastap barǵan alǵashqy sport kesheni «STRONG» fıtnes ortalyǵy boldy.
«Etalon Klınıng» JShS dırektory Oksana Maslova qaladaǵy Aqpan batyr kóshesi, 111-de ornalasqan jalpy aýdany – 950 sharshy metrdi quraıtyn «STRONG» fıtnes ortalyǵyn jalǵa alý arqyly memlekettik tapsyryspen jumys isteýde. Kásipker boks (120 bala) jáne taekvondo (40 bala) sport túrlerinen 160 balaǵa ótinim joldaǵan. Oksana Nıkolaevna qazirgi tańda 110 ata-anadan ótinim túsip, 109 ata-ana men kásipker arasynda ekijaqty kelisim-shart jasalǵanyn aıtady.
