Shymkent qalasy ákimi orynbasary BAQ ókilderimen birge qaladaǵy birqatar nysandardy aralady. Sonymen qatar, Maqsut Isahov jastardyń sport sekııasyna jappaı jazylyp jatqanyn aıtty. Eń bastysy, baspasóz týry barysynda D. Qonaev-T. Rysqulov kóshesi qıylysyndaǵy jolaıryqtyń qazan aıynda aıaqtalatyn atap ótti.
D. Qonaev dańǵyly qurylysynyń 3-kezeńi búgingi tańda qarqyndy júrýde. Shymkent ákiminiń orynbasary Maqsut Isahov jumysshylardyń qaýipsizdigi men qurylystyń sapasy basty nazarda ekenin jetkizdi. Munda qazir memleket muqtajyna alynǵan úılerdi súrý syndy jumystar júrgizilýde.
Maqsut Isahov, Shyment qalasy ákiminiń orynbasary: «100-den astam úılerdi, bıznes obektilerdi, nysandardy satyp alý kerek. Qazirgi tańda sol satyp alý jumystary qarqyndy júrip jatyr. Jańa kórdińizder ǵoı, «Abaı» degen magazındi buzyp jatyrmyz, «Jibek Joly» degen magazındi buzyp jatyrmyz. Taǵy 1-2 maı quıý beketterin satyp alý kerek. Temir joldyń arǵy betine keletin bolsaq, osy temirjoldy astymen ótip ketedi bolashaqta. Mine, ústimen kópirjol salyp jatyrmyz, myna kópir salynǵannan keıin myna temirjol alynady. Mynaý ýaqytsha temirjol».
Qonaev-Rysqulov kóshesi qıylysyndaǵy jolaıyryqtyń qurylys jumystarymen jýrnalısterdi tanystyrǵan qala ákiminiń orynbasary nysandy aǵymdaǵy jyldyń qazan aıynda tapsyrý josparlanyp otyr.
Maqsut Isahov, Shymkent qalasy ákiminiń orynbasary: «Tyrysyp jatyrmyz beremiz qazan aıynda, Alla qalasa. Bul jerde kedergi sol bolǵan maı quıý beketi. Ol másele sheshildi. Odan keıingi mynaý qymbattaý máselesi bolǵan. Ony da myna kezeń-kezeńimen sheship kele jatyrmyz. Biraq sol aıtylǵan ýaqytta bitirýge tyrysamyz. Basqa kedergi joq».
Maqsut Isahov sodan soń memlekettik tapsyryspen jan basyna qarjylandyrý jobasyna qamtylǵan birqatar jekemenshik sporttyq nysandarǵa bardy. Sonyń biri fıtnes ortalyǵy. Munda 4 pen 18 jas aralyǵyndaǵy balalardy qabyldaıdy.
Rasýl Egemberdıev, jattyǵý zalynyń dırektory: «Ata-anadan 12 myń teńge alatyn edik, qazir ony memleket tólep jatyr. Bizge memleket tólegen jaqsy. Ne úshin degende, jaǵdaıy joqtar osy jerge kep qatysa alady tegin. Olarǵa ókimet tóleıdi».
Turǵyndardyń mazasyn alyp júrgen máseleniń biri – ınternet jelisi. Bul sala da Maqsut Isahov jetekshilik etetin salalardyń biri. Qarataý aýdanyna qarasty 4 myńnan astam úıi bar «Aqjaıyq» shaǵynaýdan halqy ınternet jelisine qatysty máseleni kópten beri aıtyp keledi. Qazirgi tańda 400 shaqyrymdyq abonenttik kabel tartylypty. Onda ótinish qaldyrǵan 500-den astam otbasy joǵarǵy jyldamdyqty sapaly ınternetke qol jetkizip otyr.
Áset Ábdirahmanov, Shymkent qalalyq ıfrlandyrý basqarmasynyń basshysy: «Qazirgi tańda mynaý «i-LinkNet» kompanııasy «Aqjaıyq» móltek aýdanynan bastady. Sonymen qatar, «Dostyqty» 100 paıyz qamtyp qoıdy. Jalpy 650 km. Bul jerde 35 myń halyq turady. 1991 jyldan beri sapaly ınternet bolmaǵan. Qazir mine júrgizip jatyrmyz».
Aıta keteıik, bıyl Shymkentte 300 shaqyrymnan asa joldy jóndeýden ótkizý josparlanyp otyr. Al byltyr bul kórsetkish 400 shaqyrym joldy quraǵan. Aqjaǵalylar ýaqyttyń tyǵyz ekenin aıtady. Biraq der kezinde aıaqtaımyz dep sendirip otyr. Al sapa – basty nazarda bolady deıdi.
