Úshinshi megapolıste jastar jalpy halyqtyń 21,7% paıyzyn nemese 239 986-adamdy quraıdy. Qalada 8 joǵary jáne 38 arnaýly oqý oryndary bar. Bul bilim ordalarynda 125 390 stýdent bilim alýda. 2021 jyly qala ákiminiń bastamasymen 4 aýdanda Jastarǵa qyzmet kórsetý ortalyqtary ashyldy. Bul týraly táýelsizdiktiń 30 jyldyǵyna oraı kórme ortalyǵynda ótken qala ákimdiginiń janyndaǵy jastar saıasaty jónindegi keńeste aıtyldy.
«Jastar qoǵamnyń qozǵaýshy kúshi» atty keńes ashyq áńgime formatynda ótti. Oǵan qalalyq jastar resýrstyq ortalyǵy muryndyq boldy. Keńeste megapolıs jastar saıasatyn qalyptastyrýda, jumyssyzdyqtyń aldyn alýda atqarylyp jatqan jumystar sóz boldy. «Jastar - Otanǵa» jol kartasy ındıkatorlarynyń oryndalý barysy qorytyndylanyp, aldaǵy atqarylatyn jumystary saralandy. Kezdesý barysynda óńirimizde jas kásipkerlerge arnalǵan jobalar, maýsymdyq jumystar men jastar ortalyqtarynyń jumysy qozǵaldy.
Qala ákiminiń birinshi orynbasary Shyńǵys Muqannyń tóraǵalyǵymen ótken keńeske «Nur Otan» partııasy qalalyq fılıaly tóraǵasynyń birinshi orynbasary Janar Bektaeva, taekvondoshy, Qazaqstan Respýblıkasynyń chempıony, London Olımpıadasynyń qatysýshysy, Azııa oıyndarynyń jeńimpazy Ferýza Ergeshova, QR Aqparat jáne qoǵamdyq damý mınıstrligi «Jastar» ǵylymı zertteý ortalyǵynyń dırektory Aıan Sakoshev pen máslıhat depýtattary, aýdan ákimderi, quqyq qorǵaý, aýmaqtyq departament basshylary, qala ákimdiginiń basqarma basshylary, túrli salada jumys jasaıtyn jas mamandar, joǵarǵy oqý orynnyń basshylary, joǵary jáne orta arnaýly oqý oryndarynyń stýdentteri men 400-ge jýyq belsendi jas qatysty.
Jıynda sóz alǵan Shyńǵys Jumabekuly shaharda memlekettik jastar saıasatyn júzege asyrylý barysyna toqtaldy.
– Barshańyzǵa belgili bıyl elimizde egemendiktiń 30 jyldyǵy atalyp ótip jatyr. Shymkentte árbir ekinshi adam nemese halyqtyń 52 paıyzy táýelsizdiktiń tól týmalary. Ortasha jas – 26. Shymshahar – elimizdegi jastardyń qalasy. Megapolıstiń bolashaǵy jarqyn, jastardyń múmkindikteri mol. Búgingi jastarǵa eń birinshi bilim kerek. Bul rette qalamyzda 782 bilim berý uıymy bar. Kásipkerlik salasynda jáne jastardy jumyspen, baspanamen qamtamasyz etýde de júıeli jumystar atqarylyp keledi. Elimizdiń damýynda jastardyń alatyn orny óte erekshe. Memleket basshysy aıtqandaı, «Táýelsizdik rýhymen ósip kele jatqan búgingi jas býyn – bizdiń erteńgi úmitimiz, senimdi tiregimiz», - dedi Shyńǵys Muqan.
Jıyn barysynda qaladaǵy jumyspen qamtý, kásipkerlik, turǵyn úı salalary boıynsha atqarylyp jatqan jumystar arnaıy beınerolık arqyly tanystyryldy. Memlekettik baǵdarlamalardyń sharapatyn kórgen jastar jaryssózge shyǵyp óz tájirıbelerimen bólisti.
