Janar-jaǵarmaı baǵasynyń ósýine qatysty pikir bildirgen energetıka mınıstri Maǵzum Myrzaǵalıev benzın men dızel otynynyń baǵasy rettelmeıtinin aıtty, dep habarlaıdy "Adyrna" ulttyq portaly.
— Janar-jaǵarmaı baǵasy rettelmeıdi. Retteý múmkin emes. Bıyl dızel otyny tapshy. Onyń bir sebebi, kórshi eldermen salystyrǵanda baǵadaǵy aıyrmashylyq. Baǵa boıynsha qazir júıeli ózgeristerdi ázirlep jatyrmyz, — dedi mınıstr.
Onyń aıtýynsha, elimizde birinshiden, qazir úsh munaı óńdeý zaýytynda josparly jáne jospardan tys jóndeý jumystary júrgizilip jatyr, olardyń sharttaryn anyqtaý kerek. Ekinshiden, materıaldyq-tehnıkalyq rezervtik bazany qalyptastyrý qajet. Úshinshiden, janar-jaǵarmaıdy baqylaý, árbir munaı bazasynda tıisti qural-jabdyqtarmen jaraqtandyrý kerek.
Sóz sońynda M.Myrzaǵalıev jyl aıaǵyna deıin jarııalanǵan josparlar boıynsha tıisti ózgerister engiziletinin aıtty.
"Adyrna" ulttyq portaly.