QazAqparat - QR Ulttyq qaýipsizdik komıtetiniń Atyraý oblysy boıynsha departamenti jolaýshylar tasymaldaýshylarynan aqsha bopsalap kelgen topty ustady. Bul týraly QR UQK baspasóz qyzmetinen málim etti, dep habarlaıdy QazAqparat.
«Atyraý qalasynda 2 jyl boıy «Atyraý-Astrahan», «Atyraý-Oral», «Atyraý-Beıneý» baǵyttarynda jolaýshylardy tasymaldaýmen aınalysatyndardan aqsha qarajattaryn bopsalaýmen júıeli túrde aınalysyp kelgen adamdar toby quryqtaldy. Atalǵan baǵyttarda 200-ge jýyq avtokólik júrip turǵan. Aı saıyn ár kólik júrgizýshisinen alym-salyqtyń kólemi 5 myńnan 25 myń teńgege deıin quraǵan. Ustalǵan tulǵalar destrýktıvti baǵyttaǵy dástúrli emes salafıttik aǵymnyń ustanýshylary bolyp tabylady», - dep atap ótilgen QR UQK málimetinde.
Atalǵan qylmys QR QK-niń 194-baby 2-bóliginiń 2 jáne 3-tarmaqtarynda kórsetilgen qylmys belgileri boıynsha sotqa deıingi tergep-tekserýdiń biryńǵaı tizilimine tirkeldi. «Toptyń alty belsendi múshesine qatysty kúzetpen qamaýda ustaý túrindegi bultartpaý sharasy qoldanyldy», - dep naqtylanǵan taratylǵan málimette.
inform.kz
