Shymkent qalasynda «Táýelsizdik – babalar amanaty» atty jas aqyndar arasynda respýblıkalyq «Kúmis qalam» poezııalyq keshi máresine jetti. Elimizdiń túkpir-túkpirinen jınalǵan jas aqyndardyń ishinen oza shaýyp, jarqyraı kóringen úzdikter anyqtaldy.
Aqtóbe oblysynan kelgen Ershat Qaıboldın ádebı baıqaýdyń bas júldesi «Kúmis qalam» ıegeri atandy. Jeńimpazǵa arnaıy kúmisten jasalǵan qalam men baǵaly syılyq tabys etildi.
Almaty oblysynyń ókili Aıdana Qaısarbek fınalıst atanyp, «Esenǵalı Raýshanov» atyndaǵy arnaıy syılyqpen marapattaldy.
Jartylaı fınalǵa ótken 4 aqyn – Nurbolat Joldasbek (Jambyl oblysy) «Járken Bódeshuly», Álimjan Álisher (Shymken qalasy) «Ábilda Aımaq», Muqaǵalı Kenjetaı (Túrkistan oblysy) «Jeńis Bahadúr», Saltanat Madııarqyzy (Shymkent qalasy) «Ádil Botpanov» atyndaǵy syılyqqa ıe boldy. Qalǵan 14 aqynǵa qalamaqy men baǵaly syılyqtar berildi.
Nur Otan partııasy Shymkent qalalyq fılıaly tóraǵasynyń birinshi orynbasary Janar Bektaeva qatysýshylarǵa alǵysyn jetkizip, jeńimpazdar men júldegerlerdi marapattady.
Is-sharada Qazaqstan Jazýshylar odaǵy basqarma tóraǵasynyń orynbasary Baqyt Bedelhan, QR Eńbek sińirgen qaıratkeri Hanbıbi Esenqaraqyzy, QR Jazýshylar odaǵynyń múshesi Baqytjan Aldııar, «Qarataý» dástúrli óner mektebiniń ustazy Abaı Qalshabek, «Aıtys aqyndary men jyrshy-termeshilerdiń halyqaralyq odaǵynyń» múshesi Bekmurat Anarbaev aqyndarǵa óz baǵasyn berip, jeńimpazdardy anyqtady.
Aıta ketsek, baıqaýdyń maqsaty – Táýelsizdiktiń 30 jyldyǵynda jetken jetistikterdi nasıhattaý, ádebı úrdiste daryndy jas aqyndardyń jarqyrap kórinýine jol ashý.
